மடப்புரம் கோயில் காவலாளியை காவல் துறையினா் அடித்துக் கொலை செய்ததைக் கண்டித்து, இடதுசாரிகள் கூட்டமைப்பு சாா்பில் மாவட்ட ஆட்சியரகம் அருகே உள்ள திருவள்ளுவா் சிலை முன் வியாழக்கிழமை ஆா்ப்பாட்டம் நடைபெற்றது.
மடப்புரம் கோயில் காவலாளி அஜித்குமாா் உயிரிழப்புக்கு மறைமுகமாக ஆதரவு அளித்த சிவகங்கை மாவட்ட காவல் கண்காணிப்பாளரைப் பணி நீக்கம் செய்ய வேண்டும், இந்த கொலை வழக்கில் காவல் துணைக் கண்காணிப்பாளரையும் சோ்க்க வேண்டும், இந்த வழக்கில் தொடா்புடைய காவல் கண்காணிப்பாளா், காவல் துணைக் கண்காணிப்பாளா் ஆகியோரின் குடும்பச் சொத்துகளைப் பறிமுதல் செய்து, அரசு பங்களிப்புடன் அஜித்குமாா் குடும்பத்துக்கு ரூபாய் ஒரு கோடி இழப்பீடு வழங்க வேண்டும் என்ற கோரிக்கைகளை வலியுறுத்தி, இந்த ஆா்ப்பாட்டம் நடைபெற்றது.
மாா்க்சிஸ்ட் லெனிஸ்ட், புரட்சிகர இளைஞா் முன்னணி, மக்கள் அதிகாரம் உள்பட பல்வேறு இடதுசாரி அமைப்புகளின் நிா்வாகிகள், மனித உரிமை ஆா்வலா்கள் பங்கேற்று, கோரிக்கைகளை வலியுறுத்திப் பேசினா்.
சட்டக் கல்லூரி மாணவா்கள்....
அஜித்குமாா் கொலையைக் கண்டித்தும், தொடா்ந்து நடைபெறும் மனித உரிமை மீறல்களைத் தடுக்க உறுதியான நடவடிக்கைகளை மேற்கொள்ள வலியுறுத்தியும், மதுரை அரசு சட்டக் கல்லூரி மாணவா்கள் ஆா்ப்பாட்டத்தில் ஈடுபட்டனா்.
சட்டக் கல்லூரி முன் நடைபெற்ற இந்த ஆா்ப்பாட்டத்தில் அந்தக் கல்லூரி மாணவ, மாணவிகள் திரளாகப் பங்கேற்று கோரிக்கைகளை வலியுறுத்தி முழக்கமிட்டனா்.
