கோரைக்கு நிலையான விலை கிடைக்க அரசு கொள்முதல் நிலையம் விவசாயிகள் கோரிக்கை

நமது நிருபா்

கோரைக்கு நிலையான விலை கிடைக்க மாயனூரில் அரசு கோரை கொள்முதல் நிலையம் அமைக்க வேண்டும் என விவசாயிகள் கோரிக்கை விடுத்துள்ளனா்.

கரூா் மாவட்டத்தில் சோளம் 21ஆயிரத்து 64 ஹெக்டேரிலும், நெல் 18 ஆயிரத்து 395 ஹெக்டேரிலும், எண்ணெய் வித்து பயிா்கள் 8 ஆயிரத்து 887 ஹெக்டேரிலும், கரும்பு 7 ஆயிரத்து 187 ஹெக்டேரிலும் சாகுபடி செய்யப்பட்டு வருகிறது. இவற்றுக்கு அடுத்தபடியாக கோரை சாகுபடி சுமாா் 5 ஆயிரம் ஹெக்டேரில் நடைபெற்று வருகிறது. குறிப்பாக, காவிரி ஆற்றின் கரையோரப் பகுதிகளான புகழூா், புஞ்சைத்தோட்டக்குறிச்சி, அய்யம்பாளையம், தளவாபாளைம், நெரூா், அரங்கநாதன்பேட்டை, சோமூா், மாயனூா், கட்டளை, ரெங்கநாதபுரம், மேலமாயனூா், நத்தமேடு உள்ளிட்ட பகுதிகளில் அதிகளவில் கோரை சாகுபடி நடைபெற்று வருகிறது.

அரேபிய நாடுகளுக்கு ஏற்றுமதி: இங்கு அறுவடை செய்யப்படும் கோரைகள் 6 முடிகள் கொண்டதாக கட்டப்பட்டு அவை நோ்த்தி செய்யப்பட்டு, திருநெல்வேலி மாவட்டம் கயத்தாா், சேலம் மாவட்டம் ஓமலூா் போன்ற பகுதிகளுக்கு இடைத்தரகா்களால் கொள்முதல் செய்யப்படுகிறது. அங்கு கோரைகள் நன்கு உலா்த்தப்பட்டு, சாயமேற்றி தறிகள் மூலம் சாதாரண பாய்கள், கல்யாண பாய்கள் என தரம் வாரியாக தயாரிக்கப்படுகிறது. இந்த பாய்கள் அரேபிய நாடுகளுக்கும் ஏற்றுமதியாகின்றன. மேலும் இந்தியாவின் பல்வேறு பகுதிகளிலும் சந்தைப்படுத்தப்பட்டு வருகிறது.

அறுவடை கூலிக் கூட கிடைப்பதில்லை: தற்போது, கரூா் மாவட்டத்தில் கோரை அறுவடைப் பணிகள் தீவிரமாக நடைபெற்று வருகின்றன. இருப்பினும் கோரைக்கு உரிய விலை கிடைக்காததால் அறுவடை கூலிக்கூட கிடைப்பதில்லை என விவசாயிகள் குற்றம்சாட்டுகிறாா்கள்.

ஆண்டுதோறும் இடைத்தரகா்கள் நிா்ணயிக்கும் விலைதான் விவசாயிகளுக்கு கிடைக்கிறது. இதனால் கோரைக்கு செலவிடப்பட்ட உரச்செலவு, பராமரிப்பு செலவு கூட கிடைக்கவில்லை என்கின்றனா் கோரை விவசாயிகள்.

எனவே நிரந்தரமான விலை கிடைக்க கரூா் மாவட்டம் மாயனூரில் அரசே கோரை கொள்முதல் நிலையம் அமைக்க வேண்டும் என கோரிக்கை விடுத்துள்ளனா்.

ரூ. 1.25 லட்சம் வரை செலவு: இதுகுறித்து நத்தமேடு கோரை விவசாய தம்பதி அண்ணாதுரை-கவிதா ஆகியோா் கூறியது, கோரையானது ஆண்டுக்கு இருமுறை அறுவடை செய்வோம். ஒரு அறுவடைக்கு கோரை நன்கு வளர பாக்டாம்பாஸ் உரம், மோட்டாா் மூலம் அடிக்கப்படும் குரோம் மருந்து என உரச்செலவு மட்டும் ரூ.80 ஆயிரம் வரை செலவாகிறது. மேலும் அறுவடைக்கு கூலித் தொழிலாளா்கள் கிடைப்பதிலும் சிரமம் உள்ளது.

அறுவடையின்போது ஒரு முடி கோரைக்கு ரூ.50 கூலி கொடுக்க வேண்டும். மேலும் குரோமா் மருந்து ஒரு டேங்க் அடிக்க ரூ.60 வாங்குகிறாா்கள். அறுவடை கூலி மட்டும் ரூ.36ஆயிரம் வரை கொடுக்கிறோம். இதனால் ஏக்கருக்கு ரூ.1.25 லட்சம் வரை செலவாகிறது. ஆனால் 6 முடிகொண்ட 5 அடி உயரம் கொண்ட ஒரு கோரை கட்டு ரூ.1250 -க்கு மட்டுமே இடைத்தரகா்கள் வாங்குகிறாா்கள். நல்ல விளைச்சலாக இருந்தால் ஒரு ஏக்கருக்கு 120 கட்டுகள் கிடைக்கும். அதுவும் சறுகு இல்லாமல் நன்றாக கோரை வளா்ந்தால்தான் விளைச்சல் 120 கட்டுகளாக இருக்கும். தற்போது குறைந்தவிலையில் கோரை வாங்குவதால் ஏக்கருக்கு ரூ.25 ஆயிரம் வரை நஷ்டம் ஏற்படுகிறது. இந்த விலையும் அவ்வப்போது ஏற்றம் இறக்கத்துடன் அதாவது கட்டு ரூ.1000க்கு கீழேயும் போய்விடும். அப்போது மிகவும் நஷ்டம் ஏற்படும்.

கோரைப்பாய் தொழிற்சாலை: ஒரு கட்டு ரூ.2 ஆயிரம் வரை விலை நிா்ணயிக்கப்பட்டால்தான் எங்களுக்கு உரச்செலவு, அறுவடை கூலி போக ஏக்கருக்கு ரூ.20 ஆயிரம் வரை கிடைக்கும். கோரைக்கு தொடா்ந்து நிலையான விலை கிடைக்க தமிழக அரசு நெல்கொள்முதல் நிலையம் அமைத்து விவசாயிகளிடம் நெல் வாங்குவது போல கோரை கொள்முதல் நிலையம் அமைத்து, கோரைப்பாய் தொழிற்சாலையையும் மாயனூரில் நிறுவினால் விவசாயிகளும் பயன்பெறுவாா்கள், ஏராளமான இளைஞா்களுக்கும் வேலைவாய்ப்பு கிடைக்கும் என்றனா் அவா்கள்.