கோவையில் மத்திய உள்துறை அமைச்சா் அமித் ஷா

மத்திய உள்துறை அமைச்சா் அமித் ஷா 2 நாள் பயணமாக கோவைக்கு செவ்வாய்க்கிழமை வந்தாா்.

மத்தியப் பிரதேச மாநிலம் போபாலில் இருந்து தனி விமானம் மூலம் செவ்வாய்க்கிழமை இரவு கோவை விமான நிலையம் வந்த அவரை மத்திய செய்தி ஒலிபரப்புத் துறை இணை அமைச்சா் எல்.முருகன், பாஜக மாநிலத் தலைவா் கே.அண்ணாமலை, பாஜக மகளிரணி தேசியத் தலைவா் வானதி சீனிவாசன், முன்னாள் ஆளுநா் தமிழிசை செளந்தரராஜன், மாநிலப் பொருளாளா் எஸ்.ஆா்.சேகா், மாநகா் மாவட்டத் தலைவா் ஜெ.ரமேஷ்குமாா் உள்ளிட்ட பலா் வரவேற்றனா்.

இதைத் தொடா்ந்து விமான நிலையத்தில் இருந்து அவிநாசி சாலையில் உள்ள நட்சத்திர விடுதிக்கு சென்ற அமித் ஷா, அங்கு கொங்கு மண்டல முக்கியப் பிரமுகா்கள் மற்றும் தொழில் அதிபா்களை சந்தித்துப் பேசினாா்.

இதையடுத்து, கோவை பீளமேடு பகுதியில் புதிதாக கட்டப்பட்டுள்ள பாஜக மாநகா் மாவட்ட அலுவலக கட்டடத்தை புதன்கிழமை காலை திறந்துவைக்கிறாா். அத்துடன் ராமநாதபுரம் மற்றும் திருநெல்வேலி மாவட்டங்களில் கட்டப்பட்டுள்ள பாஜக அலுவலகங்களையும் காணொலிக் காட்சி மூலம் திறந்துவைக்கிறாா்.

பின்னா் கட்சி அலுவலகத்தில் தமிழகத்தின் பல்வேறு பகுதிகளில் இருந்து வந்துள்ள 1,000-த்துக்கும் மேற்பட்ட பாஜக நிா்வாகிகளுடனான ஆலோசனைக் கூட்டத்தில் பங்கேற்றுப் பேசுகிறாா்.

பின்னா் ஈஷா யோக மையத்தில் மாலையில் நடைபெறும் மகா சிவராத்திரி விழாவில் பங்கேற்றுவிட்டு இரவு கோவையில் தங்கும் அவா், வியாழக்கிழமை காலை சிறப்பு விமானத்தில் புதுதில்லி திரும்புகிறாா்.