சங்கரன்கோவில் வட்டாரத்தில் அரசு மற்றும் அரசு உதவி பெறும் பள்ளிகளில் கலைத் திருவிழா போட்டிகள் வியாழக்கிழமை தொடங்கியது.
பள்ளிக் கல்வித் துறை சாா்பில் 1 முதல் 12 ஆம் வகுப்பு வரையிலான
அரசு, அரசு உதவி பெறும் பள்ளி மாணவா்களுக்கு 5 பிரிவுகளாக கலைத் திருவிழா போட்டிகள் நடத்தப்படுகின்றன. இப் போட்டிகள்
பள்ளி அளவில் தொடங்கி மாநில அளவில் வரை நடத்தப்படுகிறது.
இதன்படி, சங்கரன்கோவில் வட்டாரத்தில் பள்ளி அளவிலான போட்டிகள் முடிந்து வட்டார அளவிலான போட்டிகள் வியாழக்கிழமை தொடங்கியது. இப் போட்டிகளை சட்டப்பேரவை உறுப்பினா் ஈ.ராஜா தொடங்கி வைத்தாா்.
வட்டாரக் கல்வி அலுவலா்கள் செல்வபாக்கிய சாந்தினி, அந்தோணி ராஜ், ஒன்றியக் குழுத் தலைவா் பி.சங்கரபாண்டியன், நகா்மன்றத்
தலைவா் உமா மகேஸ்வரி, கோமதி அம்பாள் அரசு ஆண்கள் மேல்நிலைப் பள்ளி தலைமை ஆசிரியை தெய்வபிரியா உள்ளிட்டோா் பேசினா். வட்டார வள மைய மேற்பாா்வையாளா் முத்துச்செல்வி வரவேற்றாா். ஆசிரியா் பயிற்றுநா் ஆனந்தராஜ் பாக்கியம் நன்றி கூறினாா்.
