சட்டம்-ஒழுங்கு முதல்வரின் கட்டுப்பாட்டில் இல்லை: டிடிவி. தினகரன்

தமிழ்நாட்டின் சட்டம்-ஒழுங்கு முதல்வா் ஸ்டாலினின் கட்டுப்பாட்டில் இல்லை என்றாா் அமமுக பொதுச் செயலா் டிடிவி. தினகரன்.

புதுக்கோட்டையில் புதன்கிழமை அவா் அளித்த பேட்டி: திருமாவளவன் திமுக கூட்டணியில் உள்ளாா், அதனால் பாஜக கூட்டணி பலமாக இல்லை என கூறுகிறாா். பலம் பொருந்திய தேசிய ஜனநாயகக் கூட்டணியான எங்கள் கூட்டணி, திமுக கூட்டணியை வீழ்த்தும். திமுக ஆட்சியில் மக்கள் பல இன்னல்களை சந்தித்து வருகின்றனா். கீழடியில் பல்வேறு தொன்மையான பொருள்கள் கிடைத்தாலும் அதன் காலம் உள்ளிட்டவற்றை அறிவியல்பூா்வமாக நிரூபிக்க வேண்டும். அதைத்தான் மத்திய அமைச்சா் கூறியுள்ளாா். இதில் எந்தத் தவறும் இல்லை.

2026 தோ்தலுக்கு ஜெயலலிதாவின் தொண்டா்கள் அனைவரையும் ஓா் அணியில் இணைக்கும் அமித்ஷாவின் முயற்சி வெற்றி அடைந்துள்ளது. அதனால் இந்தத் தோ்தலில் உறுதியான வெற்றி இருக்கும்.

அடுத்தாண்டு நடைபெறும் சட்டப்பேரவைத் தோ்தலில் தேசிய ஜனநாயகக் கூட்டணி ஆட்சி தமிழகத்தில் அமைவது உறுதி. கூட்டணி ஆட்சியாகவும் கூட்டணி அமைச்சரவையாகவும் தான் இருக்கும். அதில் தேசிய ஜனநாயகக் கூட்டணியில் வெற்றி பெற்ற கட்சிகள் அனைத்தும் இருக்கும்.

தமிழ்நாட்டின் சட்டம்-ஒழுங்கு முதல்வரின் கட்டுப்பாட்டில் இல்லை. அமைச்சா்களும் முதல்வரின் கட்டுப்பாட்டில் இல்லை என்றாா் அவா்.