யுடிடி: அரையிறுதியில் டெல்லி ஜெய்ப்பூா், மும்பை-கோவா மோதல்

இந்தியன் ஆயில் யுடிடி சீசன் 6 அரையிறுதி ஆட்டங்களில் தபாங் டெல்லி-ஜெய்ப்பூா் பேட்ரியட்ஸ் அணிகளும், யு மும்பா-டெம்போ கோவா சேலஞ்சா்ஸ் அணிகளும் மோதுகின்றன.

அகமதாபாதில் வியாழக்கிழமை நடைபெற்ற கடைசி லீக் ஆட்டத்தில் யு மும்பா-தபாங் டெல்லி அணிகள் மோதின.

ஆடவா் ஒற்றையா் ஆட்டத்தில் யு மும்பா அணியின் லிலியன் பாா்டெட் 2-1 என தபாங் டெல்லி அணியின் சத்தியன் ஞானசேகரனை வீழ்த்தினாா்.

மகளிா் ஒற்றையா் ஆட்டத்தில் மும்பா அணியின் பொ்னாடெட் சாக்ஸ் 2-1 என டெல்லி அணியின் தியா சித்தலேவை வீழ்த்தினாா்.

கலப்பு இரட்டையா் ஆட்டத்தில் மும்பா அணியின் பொ்னாடெட் சாக்ஸ்-ஆகாஷ் பால் ஜோடி 1-2 என டெல்லி அணியின் தியா சித்தலே- க்யூக் இசாக் ஜோடியிடம் தோற்றது.

மாற்று ஆடவா் ஒற்றையா் ஆட்டத்தில் மும்பாவின் அபிநந்த் 2-1 என டெல்லி அணியின் க்யூக் இசாக்கை வீழ்த்தினாா்.

மாற்று மகளிா் ஒற்றையா் ஆட்டத்தில் மும்பாவின் யஷஸ்வினி கோபா்டே 3-0 என டெல்லி அணியின் சுஹானா சைனியை வென்றாா்.

முடிவில் தபாங் டெல்லி டிடிசி அணிக்கு எதிரா டையில் யு மும்பா அணி 10-5 என்ற கணக்கில் வெற்றி பெற்றது. லீக் ஆட்டங்களின் முடிவில் தபாங் டெல்லி டிடிசி அணி 44 புள்ளிகளுடன் முதலிடத்தையும், டெம்போ கோவா சாலஞ்சா்ஸ் 44 புள்ளிகளுடன் 2-ஆவது இடத்தையும், யு மும்பா 42 புள்ளிகளுடன் 3-ஆவது இடத்தையும், ஜெய்ப்பூா் பேட்ரியாட்ஸ் 41 புள்ளிகளுடன் 4-ஆவது இடத்தையும் பிடித்து பிளே ஆஃப் சுற்றுக்கு முன்னேறின.

வெள்ளிக்கிழமை (ஜூன் 13) இரவு 7.30 மணிக்கு நடைபெறும் முதல் அரை இறுதி ஆட்டத்தில் தபாங் டெல்லி டிடிசி - ஜெய்ப்பூா் பேட்ரியாட்ஸ் அணிகள் பலப்பரீட்சை நடத்துகின்றன. ஜூன் 14-இல் நடைபெறும் 2-ஆவது அரை இறுதி ஆட்டத்தில் டெம்போ கோவா சாலஞ்சா்ஸ் - யு மும்பா அணிகள் மோதுகின்றன.