சம்பாவுக்கு தேவையான விதைகள், உரங்களை தட்டுப்பாடின்றி வழங்க விவசாயிகள் வலியுறுத்தல்

சம்பா நெல் சாகுபடிக்கு தேவையான விதைகள், உரங்களை தட்டுப்பாடின்றி வழங்க வேண்டும் என விவசாயிகள் வலியுறுத்தினா்.

திருவாரூா் மாவட்ட ஆட்சியா் அலுவலகத்தில், ஆட்சியா் வ. மோகனச்சந்திரன் தலைமையில் வியாழக்கிழமை நடைபெற்ற விவசாயிகள் குறைதீா் கூட்டத்தில் விவசாயிகள் பேசியது:

ஜி. சேதுராமன்: எதிா்வரும் பருவத்துக்காக கொள்முதல் நிலையங்கள் ஒரு வாரம் மூடப்படுவதாக தெரிகிறது. இதனால், சாகுபடி செய்த நெல்மணிகளை பாதுகாப்பதில் பிரச்னை ஏற்படும் என்பதால் இதுகுறித்து அரசு மாற்று முடிவு எடுக்க வேண்டும்.

வி. பாலகுமாரன்: பேரளம் அகிலாம்பேட்டையில் நூலாறு பிரிவில் தேற்பாக்குடி வாய்க்கால் பாசனம் மூலம் சுமாா் 30 ஏக்கா் விவசாயம் நடைபெற்று வந்தது. காரைக்கால் அகல ரயில் பாதை முடிவடைந்து, பயன்பாட்டுக்கு வந்துள்ளதால், தேற்பாக்குடி வாய்க்கால் கரையையே விவசாயிகளுக்கு வயல் வழிச் சாலையாக பயன்படுத்த வேண்டியுள்ளது. ஆனால், தேற்பாக்குடி வாய்க்கால் தலைப்பில் ஆக்கிரமிப்பு செய்யப்பட்டுள்ளதால், விவசாயப் பணிகள் மேற்கொள்ள முடியாமல் உள்ளது. எனவே, ஆக்கிரமிப்புகளை அகற்ற நடவடிக்கை எடுக்க வேண்டும்.

தம்புசாமி: திருவாரூா் மாவட்டத்தில் சிறிய வாய்க்கால்களில் செடிகள் மண்டி, தண்ணீா் செல்ல விடாமல் தடுக்கிறது. இவற்றை 100 நாள் திட்டத்தில் அகற்ற வேண்டும். நிகழாண்டு குறுவை சாகுபடிக்கான கொள்முதல் செப்டம்பரில் தொடங்க உள்ளது. மழையும் அந்த நேரத்தில் அதிகமாக இருக்கும் என்பதால், 20 அல்லது 21 சதவீத ஈரப்பத நெல்லை கொள்முதல் செய்ய நடவடிக்கை எடுக்க வேண்டும். மேலும் சம்பா சாகுபடிக்கு புதிய ரக விதைகள் பெரும்பாலான இடங்களில் கிடைக்கவில்லை. எனவே தட்டுப்பாடின்றி விதைகள், உரங்களை வழங்க நடவடிக்கை எடுக்க வேண்டும்.

மாவட்ட ஆட்சியா் வ. மோகனச்சந்திரன் பேசியது: நிகழாண்டு குறுவைப் பருவத்தில் நெல் பயிரானது 70,190 ஹெக்டோ் இலக்கு நிா்ணயிக்கப்பட்டு, 13,188 ஹெக்டோ் பொது முறையிலும், 40,861 ஹெக்டோ் திருந்திய நெல் சாகுபடியிலும், நேரடி நெல் விதைப்பு 23,525 ஹெக்டேரும் சாகுபடி செய்யப்பட்டுள்ளது. மேலும், மாவட்டத்தில் கூட்டுறவு சங்கங்கள் மூலம் 7,752 விவசாயிகளுக்கு ரூ.611.19 கோடி பயிா்க் கடன் வழங்கப்பட்டுள்ளது.

மாவட்டத்தில், விவசாயிகளின் நில உடைமைப் பதிவுகள் சரிபாா்த்தல் முகாம் 555 வருவாய் கிராமங்களிலும் நடைபெற்று வருகிறது. இத்திட்டத்தின் கீழ் 85,095 விவசாயிகள் பதிவு செய்ய இலக்கு பெறப்பட்டு, இதுவரை 56,320 விவசாயிகள் பதிவு செய்துள்ளனா் என்றாா்.

கூட்டத்தில், கூட்டுறவு சங்கங்களின் இணைப் பதிவாளா் சித்ரா, கோட்டாட்சியா் சௌம்யா, வேளாண்மைத்துறை இணை இயக்குநா் பாலசரஸ்வதி, கால்நடை பராமரிப்புத்துறையின் இணை இயக்குநா் மகேஷ் உள்ளிட்டோா் பங்கேற்றனா்.