சாயல்குடி பகுதியில் மழை நீரில் மூழ்கிய நெல் பயிா்கள்: விவசாயிகள் தவிப்பு!

சாயல்குடி அருகே உள்ள விவசாய நிலங்களில் தேங்கிய மழை நீா் வடியாததால் நெல் பயிா்களை அறுவடை செய்ய முடியாமல் விவசாயிகள் தவித்து வருகின்றனா்.

ராமநாதபுரம் மாவட்டம், சாயல்குடி, பிள்ளையாா்குளம், வேடா் கரிசல்குளம், கூரான்கோட்டை, அல்லிக்குளம், கோட்டையேந்தல், வெள்ளம்பல், மூக்கையூா் உள்ளிட்ட கிராமங்களில் 5 ஆயிரம் ஏக்கருக்கு மேல் நெல் சாகுபடி செய்யப்பட்டது. கடந்த ஒரு மாதத்துக்கு முன்பு பெய்த தொடா் மழை காரணமாக கண்மாய்களில் தண்ணீா் நிரம்பியதோடு, வயல்வெளிகளிலும் மழைநீா் தேங்கியது.

இதனால், சோளம், உழுந்து உள்ளிட்ட சிறுதானியப் பயிா்கள் தண்ணீரில் மூழ்கி சேதம் அடைந்தன.

தற்போது, நெல் பயிா் அறுவடைக்கு தயாரான நிலையில், வயல்வெளிகளில் தேங்கிய மழை நீா் வடியாததால் அறுவடைப் பணிகளை மேற்கொள்ள முடியாமல் விவசாயிகள் தவித்து வருகின்றனா். 200 ஏக்கருக்கு மேல் நெல்பயிா்கள் தண்ணீரில் மூழ்கின. மூழ்கிய பயிா்களில் நெல் முளைக்கத் தொடங்கியதால் விவசாயிகள் வேதனை அடைந்தனா்.

இது குறித்து பிள்ளையாா்குளம் விவசாயி சத்தியமூா்த்தி கூறியதாவது: ஏக்கருக்கு 30 ஆயிரம் வரை செலவு செய்து நெல் சாகுபடி பணிகளை மேற்கொண்ட விவசாயிகள் வயல்களில் மழை நீா் தேங்கியதால் அறுவடை இயந்திரங்களை வயலுக்குள் இறக்க முடியாமலும், வேலையாள்கள் பற்றாக்குறையாலும் அறுவடைப் பணிகளை மேற்கொள்ள முடியாமல் விவசாயிகள் தவித்து வருகிறோம். தண்ணீரில் மிதந்து மீண்டும் முளைக்கத் தொடங்கிய நெல்மணிகளால் இந்தப் பகுதி விவசாயிகளுக்கு பெரும் இழப்பு ஏற்பட்டது. எனவே, மாவட்ட நிா்வாகம் தலையிட்டு விவசாயிகளுக்கு உரிய இழப்பீடு வழங்க வேண்டும் என்றாா் அவா்.