சாலை மறியலுக்கு முயன்ற ஊரக வளா்ச்சித் துறை அலுவலா்கள் சங்கத்தினா் கைது

சாலை மறியலில் ஈடுபட முயன்ற ஊரக வளா்ச்சித் துறை அலுவலா் சங்கத்தை சோ்ந்தவா்களை போலீஸாா் கைது செய்தனா்.

தமிழ்நாடு ஊரக வளா்ச்சித் துறை அலுவலா்கள் சங்கத்தின் சாா்பில் நீண்ட காலம் நிலுவையில் உள்ள 20 அம்சக் கோரிக்கைகளை வலியுறுத்தி மாநிலம் தழுவிய சாலை மறியல் போராட்டம் நடத்தப்படும் என அறிவிக்கப்பட்டிருந்தது.

அதன் அடிப்படையில் ஈரோடு வட்டாட்சியா் அலுவலக வளாகத்தில் உள்ள ஈரோடு ஊராட்சி ஒன்றிய அலுவலகம் முன் செவ்வாய்க்கிழமை காலை தமிழ்நாடு ஊரக வளா்ச்சித் துறை அலுவலா்கள் சங்கத்தினா் திரண்டனா்.

தொடா்ந்து, சங்கத்தின் ஈரோடு மாவட்டத் தலைவா் கிருஷ்ணமூா்த்தி தலைமையில் ஆா்ப்பாட்டம் நடத்தினா். அதில், ஊரக வளா்ச்சித் துறையில் காலியாக உள்ள ஊராட்சி செயலா் பணியிடங்கள் உள்ளிட்ட அனைத்து காலி பணியிடங்களையும் உடனடியாக நிரப்ப வேண்டும். ஊராட்சி செயலா்களுக்கு சிறப்பு நிலை, தோ்வு நிலை, வரையறுக்கப்பட்ட ஓய்வூதியம் உள்ளிட்ட உரிமைகளை வழங்க வேண்டும்.

ஊரக வளா்ச்சித் துறை ஊழியா்கள் மீது திணிக்கப்படும் பிற துறைகளின் பணிகளை கைவிட வேண்டும். கிராம ஊராட்சி மற்றும் ஊராட்சி ஒன்றியங்கள் ஆகியவற்றை பிரித்தல் உள்ளிட்ட பணிகளுக்காக தனி ஆணையம் அமைக்க வேண்டும். பணியிடையே இறந்த அரசு ஊழியா்களின் குடும்பத்தினரை பாதுகாக்க கருணை அடிப்படையிலான பணி நியமனங்களை உடனடியாக மேற்கொள்ள வேண்டும் என ஆா்ப்பாட்டத்தில் வலியுறுத்தினா்.

அதனைத் தொடா்ந்து தமிழ்நாடு ஊரக வளா்ச்சித் துறை அலுவலா்கள் சங்கத்தினா் சாலை மறியல் போராட்டத்தில் ஈடுபட வட்டாட்சியா் அலுவலக நுழைவாயில் உள்ள திருமகன் ஈவெரா சாலையை நோக்கிச் சென்றனா். வட்டாட்சியா் அலுவலக வாசலிலேயே அவா்களை தடுத்து நிறுத்திய போலீஸாா், அனைவரையும் கைது செய்தனா்.

இதில் 70-க்கும் மேற்பட்ட தமிழ்நாடு ஊரக வளா்ச்சித் துறை அலுவலா்கள் சங்கத்தினா் கைது செய்யப்பட்டு தனியாா் திருமண மண்டபத்தில் அடைக்கப்பட்டனா். பின்னா் மாலையில் அனைவரும் விடுவிக்கப்பட்டனா்.