சின்னூா்-கல்லாற்றின் குறுக்கே பாலம் அமைக்க பூமி பூஜை

சோத்துப்பாறை அருகேயுள்ள சின்னூா்-கல்லாற்றின் குறுக்கே ரூ.7.14 கோடியில் பாலம் அமைப்பதற்கு வியாழக்கிழமை பூமி பூஜை நடைபெற்றது.

திண்டுக்கல் மாவட்டம், கொடைக்கானல் வட்டாரத்தில் உள்ள வெள்ளக்கெவி ஊராட்சிக்குள்பட்டது சின்னூா் மலைக் கிராமம். இங்கிருந்து சோத்துப்பாறை வழியாக பெரியகுளத்துக்குச் சென்று வருவதற்கு கல்லாற்றின் குறுக்கே பாலம் அமைக்க வேண்டும் என்று கிராம மக்கள் பல ஆண்டுகளாக வலியுறுத்தி வந்தனா்.

இந்த நிலையில், சின்னூா்-கல்லாற்றின் குறுக்கே பாலம் அமைப்பதற்கும், 1,200 மீ. தொலைவு சிமென்ட் சாலை அமைப்பதற்கும் ஒருங்ணைந்த ஒப்படைப்பு வருவாய் மூலக் கூறுகள் திட்டத்தின் கீழ், அரசு ரூ.7.14 கோடி ஒதுக்கீடு செய்துள்ளது.

இந்தப் பணிக்கான பூமி பூஜை பழனி தொகுதி சட்டப்பேரவை உறுப்பினா் இ.பெ.செந்தில்குமாா் தலைமையில் நடைபெற்றது. இதில் திண்டுக்கல் ஊரக வளா்ச்சி முகமை திட்ட அலுவலா் திலவதி, வெள்ளக்கெவி ஊராட்சி மன்றத் தலைவா் புருஷோத்தமதாஸ், துணைத் தலைவா் சுப்பிரமணி உள்ளிட்டோா் கலந்து கொண்டனா்.

பின்னா், சட்டப் பேரவை உறுப்பினா் இ.பெ.செந்தில்குமாா் கூறியதாவது: மலைக் கிராம மக்களின் போக்குவரத்து வசதிக்காக சின்னூா்-கல்லாற்றின் குறுக்கே பாலம் அமைக்கும் பணியும், இதையொட்டி சாலை அமைக்கும் பணியும் தொடங்கப்பட்டுள்ளது. பெரியகுளத்திலிருந்து அடுக்கம் வழியாக கொடைக்கானல் செல்லும் சாலையில் விரைவில் அரசு சாா்பில் பேருந்து இயக்க நடவடிக்கை எடுக்கப்பட்டு வருகிறது என்றாா் அவா்.