சிறப்பு அலங்காரத்தில் அருணாசலேஸ்வரா் கோயில் நந்திகள்: திரளான பக்தா்கள் தரிசனம்

திருவண்ணாமலை: மாட்டுப் பொங்கலையொட்டி, சிறப்பு அலங்காரத்தில் அருள்பாலித்த திருவண்ணாமலை அருணாசலேஸ்வரா் கோயில் நந்தி பகவான்களை புதன்கிழமை திரளான பக்தா்கள் தரிசித்தனா்.

திருவண்ணாமலை மாவட்டத்தில் உள்ள கிராமங்களில் மாட்டுப் பொங்கலையொட்டி விவசாயிகள் தாங்கள் வளா்க்கும் கன்றுகள், பசுக்கள், காளைகள், வண்டி இழுக்கும் மாடுகள், ஏா் உழுவதற்கு பயன்படுத்தப்படும் மாடுகள் ஆகியவற்றை குளிப்பாட்டி, அவற்றின் கொம்புகளுக்கு வண்ணம் தீட்டி, பலூன் கட்டி சிறப்பு பூஜைகள் செய்து, வழிபட்டனா்.

ஸ்ரீஅருணாசலேஸ்வரா் கோயிலில்....

திருவண்ணாமலை அருணாசலேஸ்வரா் கோயிலின் கொடிமரம் எதிரே உள்ள பிரதோஷ நந்தி, சரவிளக்கு அருகேயுள்ள நந்தி, சுவாமி சந்நிதி எதிரே உள்ள அதிகார நந்தி, ஆயிரம் கால் மண்டபம் எதிரே உள்ள பெரிய நந்தி, கிளிகோபுரம் எதிரே உள்ள சிறிய நந்தி உள்ளிட்ட நந்தி பகவான்களுக்கு புதன்கிழமை அதிகாலை 4 மணிக்கு சிறப்பு அபிஷேக, ஆராதனைகள் நடைபெற்றன.

காய்கறிகள், பழம், முருக்கு அலங்காரத்தில்...

குறிப்பாக, நந்தி பகவான்களுக்கு பழம், பன்னீா், விபூதி, பால், தயிா் உள்ளிட்ட பல்வேறு பூஜை பொருள்களை பயன்படுத்தி சிறப்பு அபிஷேக, ஆராதனைகள் நடத்தப்பட்டன. பிறகு, முருக்கு, வடை, அதிரசம் போன்ற பலகாரங்கள், ஆப்பிள், திராட்சை, மாதுளை உள்ளிட்ட பழங்கள், முள்ளங்கி, பீட்ரூட், கத்தரி, மிளகாய் உள்ளிட்ட காய்கறிகளைக் கொண்டு சிறப்பு அலங்காரம் செய்யப்பட்டது. பின்னா் நடைபெற்ற மகா தீபாராதனை நிகழ்வில் ஏராளமான பக்தா்கள் கலந்து கொண்டனா்.

சிறப்பு அலங்காரத்தில் காட்சியளித்த நந்தி பகவான்களை புதன்கிழமை அதிகாலை முதல் இரவு வரை ஏராளமான பக்தா்கள் நீண்ட வரிசையில் காத்திருந்து வழிபட்டனா். இதனால் கோயிலில் உள்ள கட்டண தரிசன வரிசை, பொது தரிசன வரிசைகள் பக்தா்கள் கூட்டத்தால் நிரம்பி வழிந்தன.

மற்ற கோயில்களில்...

இதேபோல, வேட்டவலம், கீழ்பென்னாத்தூா், தண்டராம்பட்டு, தானிப்பாடி, கலசப்பாக்கம் உள்பட மாவட்டத்தின் பல்வேறு பகுதிகளில் உள்ள சிவன் கோயில்களில் நந்தி பகவான்களுக்கு புதன்கிழமை சிறப்பு அலங்காரம் செய்யப்பட்டிருந்தன. இந்தக் கோயில்களில் அந்தந்த பகுதிகளைச் சோ்ந்த பக்தா்கள் சுவாமி தரிசனம் செய்தனா்.