சுமை ஆட்டோ கவிழ்ந்து வடமாநிலத் தொழிலாளி பலி

பெரம்பலூா் அருகே வெள்ளிக்கிழமை மாலை சுமை ஆட்டோ கவிழ்ந்து, வட மாநிலத்தைச் சோ்ந்த கூலித் தொழிலாளி நிகழ்விடத்திலேயே உயிரிழந்தாா்.

பெரம்பலூா் மாவட்டம், வேப்பந்தட்டைக்கு கூலி வேலைக்காக 6 தொழிலாளா்கள் சுமை ஆட்டோவில் சென்றுவிட்டு, வெள்ளிக்கிழமை மாலை பெரம்பலூா் - ஆத்தூா் சாலையில் பெரம்பலூா் நோக்கி வந்து கொண்டிருந்தனா். பெரம்பலூா் அருகேயுள்ள சோமண்டாபுதூா் பிரிவுச் சாலை அருகே வந்தபோது ஓட்டுநரின் கட்டுப்பாட்டை இழந்த சுமை ஆட்டோ சாலையோரத்தில் கவிழ்ந்தது. இதில் பலத்த காயமடைந்த ஜாா்கண்ட் மாநிலம், பகோடா் அருகேயுள்ள ஜரவான் பகுதியைச் சோ்ந்த லக்ஸ்மன் சிங் மகன் ஜகேஸ்வா் குமாா் சிங் நிகழ்விடத்திலேயே உயிரிழந்தாா்.

மேலும், இவ் விபத்தில் சுமை ஆட்டோ ஓட்டுநா் தூத்துக்குடி மாவட்டம், கரடிகுளம் மா. மாதவன் (27), ஜாா்கண்ட் மாநிலம் இ. தக்லால் சிங், திருச்சி மாவட்டம், கன்னியாகுடி சி. முத்துலட்சுமி (49), திருச்சி மாவட்டம், மண்ணச்சநல்லூா் வட்டம், தேவிமங்கலம் ர. சரசு (57), பெரம்பலூா் மாவட்டம், நாரணமங்கலம் ரா. அரவிந்த் (28), தூத்துக்குடி மாவட்டம், காட்டுநாயக்கன்பட்டி கா. லட்சுமண காா்த்தி (29) ஆகியோா் பலத்த காயமடைந்தனா்.

தகவலறிந்த பெரம்பலூா் போலீஸாா் காயமடைந்தவா்களையும், உயிரிழந்தவரின் உடலையும் மீட்டு மாவட்ட அரசு தலைமை மருத்துவமனைக்கு அனுப்பிவைத்து வழக்குப் பதிந்து விசாரிக்கின்றனா்.