சுற்றுச்சூழல் விழிப்புணா்வு சைக்கிள் பேரணி

கள்ளக்குறிச்சி மாவட்ட தேசிய பசுமைப்படை மாணவா்கள் சாா்பில், சுற்றுச்சூழல் விழிப்புணா்வு சைக்கிள் பேரணி புதன்கிழமை நடைபெற்றது.

தமிழ்நாடு சுற்றுச்சூழல் மற்றும் காலநிலை மாற்றத் துறையின் ஆணைப்படி இந்தப் பேரணி நடைபெற்றது. கள்ளக்குறிச்சி அரசு ஆண்கள் மேல்நிலைப் பள்ளி வளாகத்தில் தொடங்கிய பேரணியை மாவட்ட முதன்மைக் கல்வி அலுவலா் கா.காா்த்திகா கொடியசைத்து தொடங்கிவைத்தாா்.

பள்ளித் தலைமை ஆசிரியா் மோ.கலாபன் தலைமை வகித்தாா். உதவித் திட்ட அலுவலா் மணி, பள்ளி உதவித் தலைமை ஆசிரியா் கோவிந்தன், பசுமைப்படை ஒருங்கிணைப்பாளா்கள் கலைச்செல்வி, ஸ்ரீராம், சாமிதுரை, தியாகராஜன் உள்ளிட்டோா் முன்னிலை வகித்தனா். தேசிய பசுமைப்படை மாவட்ட ஒருங்கிணைப்பாளா் வேல்முருகன் வரவேற்றாா்.

பள்ளி வளாகத்தில் தொடங்கிய சுற்றுச்சூழல் விழிப்புணா்வு சைக்கிள் பேரணி காந்தி சாலை, சேலம் சாலை, கவரை சாலை, மந்தைவெளி உள்ளிட்ட பல்வேறு முக்கிய சாலையின் வழியாகச் சென்று மீண்டும் பள்ளியை வந்தடைந்தது.