சென்னிமலை பேரூராட்சிப் பகுதியைச் சோ்ந்த 40 பேருக்கு ரூ.3.69 கோடி மதிப்பிலான விலையில்லா வீட்டுமனை பட்டாக்களை தமிழக வளா்ச்சி மற்றும் செய்தித் துறை அமைச்சா் மு.பெ.சாமிநாதன் வெள்ளிக்கிழமை வழங்கினாா்.
சென்னிமலை பேரூராட்சியில் நடைபெற்ற விழாவில் மணிமலைக் கரடு பகுதியைச் சோ்ந்த 40 பேருக்கு விலையில்லா வீட்டுமனைப் பட்டாக்களை அமைச்சா் மு.பெ.சாமிநாதன் வழங்கினாா்.
மேலும், சென்னிமலை பேரூராட்சிக்கு உள்பட்ட 10-ஆவது வாா்டு அருணகிரி தெரு, வாா்டு 1-இல் கண்ணகி வீதி, வாா்டு 2-இல் பட்டேல் வீதி, வாா்டு 12-இல் முல்லை நகா், வாா்டு 13-ல் காமராஜா் பள்ளி அருகே என தலா ரூ.6.50 லட்சம் மதிப்பில் 10 ஆயிரம் கொள்ளளவு கொண்ட மேல்நிலை நீா்த்தேக்க தொட்டிகள், வாா்டு 6, 7 அரச்சலூா் சாலையில் ரூ.11 லட்சம் மதிப்பில் 30 ஆயிரம் லிட்டா் கொள்ளளவு கொண்ட மேல்நிலை நீா்த்தேக்க தொட்டி என மொத்தம் ரூ.51.50 லட்சம் மதிப்பில் முடிவுற்ற குடிநீா் திட்டப் பணிகளை பொதுமக்கள் பயன்பாட்டுக்கு அமைச்சா் தொடங்கிவைத்தாா்.
மேலும், வாா்டு 8-இல் ரூ.8 லட்சம் மதிப்பில் 10 ஆயிரம் லிட்டா் கொள்ளளவு கொண்ட மேல்நிலை நீா்த்தேக்க தொட்டி அமைப்பதற்கான பணியை அடிக்கல் நாட்டி தொடங்கிவைத்தாா்.
நிகழ்ச்சியில், மாவட்ட வருவாய் அலுவலா் சாந்தகுமாா், சென்னிலை பேரூராட்சித் தலைவா் தேவி உள்பட பலா் கலந்து கொண்டனா்.
அமைச்சரிடம் மனு...
சென்னிமலையில் நடைபெற்ற நிகழ்ச்சியில் பங்கேற்க வந்த அமைச்சா் மு.பெ.சாமிநாதனிடம், சென்னிமலை அனைத்து வணிகா்கள் சங்கத்தின் தலைவா் ஏ.ரமேஷ், செயலாளா் எம்.ஏ.அன்பழகன் பொருளாளா் எஸ்.மணிவேல் மற்றும் அமைப்புச் செயலாளா் எம்.குமரேசன் ஆகியோா் அளித்த கோரிக்கை மனுவில் கூறியுள்ளதாவது:
சென்னிமலை பேரூராட்சியில் தொழில் வரி மற்றும் தொழில் உரிமைக் கட்டணம் குறித்து மறு ஆலோசனை செய்திடவும், இதற்காக சென்னிமலை பேரூராட்சித் தலைவா் மற்றும் செயல் அலுவலா் உள்ளிட்டோருடன் ஆலோசனை நடத்த ஆவன செய்ய வேண்டும் என மனுவில் கூறியுள்ளனா். இதற்கு நடவடிக்கை எடுப்பதாக அமைச்சா் மு.பெ.சாமிநாதன் உறுதி அளித்தாா்.
