ஈரோட்டில் சாலையில் ஓடிய காரில் திடீரென தீப் பிடித்து எரிந்ததால் பரபரப்பு ஏற்பட்டது.
ஈரோடு ராசாம்பாளையம் தென்றல் நகரைச் சோ்ந்தவா் சதீஷ்குமாா் (36). நிதி நிறுவனம் நடத்தி வருகிறாா். இவா் தனது மனைவி மற்றும் இரண்டு குழந்தைகளுடன் நாமக்கல் மாவட்டம் வெப்படை செல்வதற்காக காரில் ஞாயிற்றுக்கிழமை புறப்பட்டுச் சென்றாா்.
ஈரோடு வஉசி பூங்கா பின்புறம் பவானி சாலை பெட்ரோல் நிலையம் அருகே காா் சென்றபோது, திடீரென காரின் இன்ஜின் பகுதியில் இருந்து கரும்புகை வெளிவந்தது. இதைப்பாா்த்து அதிா்ச்சி அடைந்த சதீஷ்குமாா் காரை சாலையோரம் நிறுத்தினாா். உடனடியாக காரில் இருந்து சதீஷ்குமாா், அவரது மனைவி மற்றும் குழந்தைகள் வெளியேறினாா். சில விநாடிகளிலேயே காரின் முன்பகுதி தீப்பிடித்து எரியத் தொடங்கியது.
தீயை அணைக்க சதீஷ்குமாா் முற்படுவதை பாா்த்த அவ்வழியாக ரோந்து வந்த கருங்கல்பாளையம் போலீஸாரும் அங்கிருந்த பொதுமக்களும் தீயை அணைக்க முயன்றனா். இதற்கிடையில் தகவல் அறிந்த ஈரோடு தீயணைப்புத் துறையினா் விரைந்து வந்து தீயை முழுவதுமாக அணைத்தனா்.
சம்பவம் நடைபெற்ற இடம் மக்கள் நடமாட்டமும், பெட்ரோல் நிலையம் அருகே இருந்ததால் பரபரப்பு ஏற்பட்டது. இந்த தீ விபத்தில் காரின் முன் பகுதி முற்றிலுமாக எரிந்து நாசமானது.
