பாகிஸ்தானுக்கு ரூ.1.70 லட்சம் கோடி (20 பில்லியன் டாலா்) கடன் வழங்க உலக வங்கி விரைவில் ஒப்புதல் அளிக்கவுள்ளது.
நிலையற்ற அரசியல் சூழல் உள்ளிட்ட பல்வேறு காரணங்களால் நிதி நெருக்கடியில் சிக்கியுள்ள பாகிஸ்தானுக்கு 6 பிரிவுகளின்கீழ் 10 ஆண்டு காலத்துக்கு இந்தக் கடனுதவி வழங்கப்படவுள்ளது.
‘பாகிஸ்தானுடனான ஒப்பந்த நடைமுறை 2025-35’ என்ற தலைப்பிடப்பட்ட இந்த முன்னெடுப்பின்கீழ் குழந்தைகளின் வளா்ச்சிக் குறைபாட்டை குறைப்பது, வறுமை ஒழிப்பு, பருவநிலை மாற்றத்துக்கு ஏற்புடைய திட்டங்களைச் செயல்படுத்துவது, சுற்றுப்புறச் சூழலில் கரியமில வாயுவின் தாக்கத்தைக் குறைப்பது, நிதியை அதிகரித்து தனியாா் முதலீட்டை ஊக்குவிப்பது போன்ற துறைகளில் கவனம் செலுத்தப்படவுள்ளது.
2025-35 காலகட்டத்தில் பாகிஸ்தானில் மூன்று பொதுத் தோ்தல்கள் நடைபெற வாய்ப்புள்ளது. இருப்பினும், இந்த முன்னெடுப்புக்கு கட்சிப் பாகுபாடின்றி அனைத்துத் தரப்பினரும் ஆதரவளிப்பதால், அரசியல் மாற்றங்கள் நிகழ்ந்தாலும் இதை அமல்படுத்துவதில் எவ்வித சிக்கலும் ஏற்படாது.
இந்த முன்னெடுப்புக்கு ஜனவரி 14-ஆம் தேதி உலக வங்கி ஒப்புதல் அளிக்கும் என எதிா்பாா்க்கப்படுகிறது. அதைத் தொடா்ந்து, உலக வங்கியின் தெற்கு ஆசிய துணைத் தலைவா் மாா்டின் ரைசா், இஸ்லாமாபாதுக்கு சுற்றுப்பயணம் மேற்கொள்ள வாய்ப்புள்ளதாகவும் கூறப்படுகிறது.
முதல்முறையாக 10 ஆண்டுகால ஒப்பந்தம்: இதுகுறித்து பாகிஸ்தானின் மூத்த அதிகாரி ஒருவா் கூறுகையில், ‘முதல்முறையாக 10 ஆண்டுகால ஒப்பந்த நடைமுறையை அறிமுகப்படுத்த பாகிஸ்தானை உலக வங்கி தோ்ந்தெடுத்துள்ளது. இந்த முன்னெடுப்பின்கீழ் ரூ.1.70 லட்சம் கோடி பாகிஸ்தானுக்கு கடனாக உலக வங்கி வழங்கவுள்ளது’ என்றாா்.
இதில், ரூ.1,19,500 கோடியை உலக வங்கியின் கிளைப் பிரிவுகளான சா்வதேச மேம்பாட்டுக் கழகமும் (ஐடிஏ), ரூ.51,500 கோடியை புனரமைப்பு மற்றும் வளா்ச்சிக்கான சா்வதேச வங்கியும் (ஐபிஆா்டி) வழங்கவுள்ளன. இந்தக் காலகட்டத்தில் நிதி மற்றும் கடன் உள்ளிட்ட காரணிகளில் பாகிஸ்தானின் செயல்பாடுகளைப் பொருத்தே அடுத்தகட்ட நிதியுதவி வழங்குவது குறித்து உலக வங்கி பரிசீலிக்கவுள்ளது.
கூடுதலாக ரூ.1.70 லட்சம் கோடி: இதுதவிர, மேலும் ரூ.1.70 லட்சம் கோடியை உலக வங்கியின் தனியாா் பிரிவுகளான சா்வதேச நிதி கழகம் (ஐஎஃப்சி) மற்றும் பன்முக முதலீட்டுக்கான உத்தரவாத அமைப்பு (எம்ஐஜிஏ) மூலம் வழங்கவும் உலக வங்கி முடிவெடுத்துள்ளது. இதன்மூலம், மொத்தமாக 3.40 லச்சம் கோடி(40 பில்லியன் டாலா்) நிதியுதவியை பாகிஸ்தானுக்கு வழங்க உலக வங்கி திட்டமிட்டுள்ள நிலையில், 20 பில்லியன் டாலா் மட்டுமே கடனுதவியாக கருதப்படும் என பாகிஸ்தான் ஊடகங்கள் வெளியிட்டுள்ள செய்தியில் குறிப்பிடப்பட்டுள்ளது.
நீண்டகால கடனுதவி: முன்னதாக, பல்வேறு துறைகளை மேம்படுத்தும் நோக்கில் குறுகிய கால கடனுதவி வழங்கி வந்த உலக வங்கி, தற்போது நீண்ட காலத்துக்கு தோ்ந்தெடுக்கப்பட்ட துறைகளில் மட்டும் அதிக வளா்ச்சியை ஊக்குவிக்க முடிவெடுத்துள்ளது குறிப்பிடத்தக்கது.
