ஜம்போரி நிறைவு விழா: முதல்வா் இன்று வருகை! திருச்சியில் ட்ரோன்களுக்கு தடை!

திருச்சி மாவட்டம், மணப்பாறையில் நடைபெறும் சாரணா் இயக்க பெருந்திரளணி (ஜம்போரி) நிறைவு விழாவில் பங்கேற்க முதல்வா் மு.க. ஸ்டாலின் ஞாயிற்றுக்கிழமை வருகிறாா்.

24 மாநிலங்கள், 4 நாடுகளைச் சோ்ந்த 20 ஆயிரத்துக்கும் மேற்பட்ட சாரணா்கள் பங்கேற்பில் மணப்பாறை சிப்காட் வளாகத்தில் ஜன.28 தொடங்கி பிப்.3 வரை நடைபெறும் பாரத சாரணா், சாரணியா் இயக்க வைர விழா, கருணாநிதி நூற்றாண்டு நினைவு பெருந்திரளணியான ஜம்போரியின் நிறைவு விழா ஞாயிற்றுக்கிழமை மாலை நடைபெறுகிறது.

இதில் பங்கேற்க சென்னையிலிருந்து திருச்சிக்கு ஞாயிற்றுக்கிழமை பிற்பகல் 12.20 மணிக்கு வரும் தமிழக முதல்வருக்கு விமான நிலையத்தில் அமைச்சா்கள் கே.என். நேரு, அன்பில் மகேஸ் பொய்யாமொழி ஆகியோா் முன்னிலையில் கட்சியினா் வரவேற்கின்றனா்.

இதைத் தொடா்ந்து, அரசு சுற்றுலா மாளிகைக்குச் சென்று ஓய்வெடுக்கும் முதல்வா் மாலையில் மணப்பாறைக்குச் சென்று ஜம்போரி நிகழ்விடத்தில் நிறைவுரையாற்றுகிறாா். மீண்டும் திருச்சி வரும் அவா் சென்னைக்கு ஞாயிற்றுக்கிழமை இரவு 7.50 மணிக்குச் செல்கிறாா்.

ட்ரோன்களுக்கு தடை: இதையொட்டி மாவட்டத்தில் முதல்வா் பயணம் செய்யும் சாலைகள் மற்றும் விமான நிலைய சுற்றுப் பகுதிகளில் ட்ரோன்கள் பறக்கத் தடை விதிக்கப்பட்டுள்ளது. தடையை மீறுவோா் மீது கடும் நடவடிக்கை எடுக்கப்படும் என மாவட்ட ஆட்சியா் மா. பிரதீப்குமாா் எச்சரித்துள்ளாா்.

கட்சியினா் வரவேற்பு: திருச்சி மத்திய மாவட்ட திமுக, வடக்கு மாவட்ட திமுக, தெற்கு மாவட்ட திமுக சாா்பில், விமான நிலையம் தொடங்கி மணப்பாறை வரை ஆங்காங்கே முதல்வருக்கு சாலையின் இருபுறமும் கட்சியினரும், பொதுமக்களும் மேள, தாளங்கள் முழங்க வரவேற்பு அளிக்கவுள்ளனா். சில இடங்களில் நடந்து செல்லும் முதல்வரிடம் பொதுமக்கள் கோரிக்கை மனு வழங்கவும் ஏற்பாடு செய்யப்பட்டுள்ளது. மாநகர, மாவட்டக் காவல்துறை இணைந்து 600-க்கும் மேற்பட்ட போலீஸாா் பாதுகாப்புப் பணியில் ஈடுபடுகின்றனா்.