தமிழ் நமது அடையாளம்; அதை இழந்துவிடக் கூடாது! பி.கே.கிருஷ்ணராஜ் வாணவராயா்

தமிழ் மொழிதான் நமது அடையாளம், அதை நாம் இழந்துவிடக் கூடாது என்று கோவை பாரதீய வித்யா பவன் தலைவா் பி.கே.கிருஷ்ணராஜ் வாணவராயா் கூறினாா்.

பாரதீய வித்யா பவன் கோவை மையத்தின் சாா்பில் விருது வழங்கும் விழா ஆா்.எஸ்.புரத்தில் உள்ள பவன் வளாகத்தில் சனிக்கிழமை நடைபெற்றது. விழாவுக்கு பி.கே.கிருஷ்ணராஜ் வாணவராயா் தலைமை வகித்தாா்.

விழாவில், ஓய்வுபெற்ற தமிழ்ப் பேராசிரியா் புலவா் அமுதனுக்கு பாரதீய வித்யா பவனின் தமிழ் மாமணி விருது வழங்கப்பட்டது. அதேபோல, கவிஞா் மரபின்மைந்தன் ம.முத்தையாவுக்கு தமிழ்ப் பணிச் செம்மல் விருது வழங்கப்பட்டது.

இருவருக்கும் விருது வழங்கி பி.கே.கிருஷ்ணராஜ் வாணவராயா் பேசியதாவது: மகாத்மா காந்தியடிகளுடன் இணைந்து சுதந்திர போராட்டத்தில் ஈடுபட்ட கே.எம்.முன்ஷியால் கடந்த 1938-ஆம் ஆண்டில் பாரதீய வித்யா பவன் தொடங்கப்பட்டது. நாட்டின் வேதகால விழுமியங்களை நவீன காலத்துடன் இணைத்துச் செயல்பட வேண்டும் என்ற நோக்கத்தில் காந்தியடிகளின் அனுமதியுடன் அவா் இந்த அமைப்பைத் தொடங்கினாா்.

தலைவா்கள் ஜவாஹா்லால் நேரு, சா்தாா் வல்லபபாய் படேல், டாக்டா் ராதாகிருஷ்ணன், ராஜாஜி, ராஜேந்திர பிரசாத் ஆகியோருடன் முன்ஷி இந்த அமைப்பைத் தொடங்கினாா்.

ஒரு பள்ளியின் வகுப்பறையில் தொடங்கப்பட்ட இந்த அமைப்பு தற்போது சா்வதேச அளவில் பரவியுள்ளது. நாட்டின் மிகப்பெரிய 4 விருதுகளையும் பெற்றுள்ள ஒரே நிறுவனம் இதுதான்.

பாரத கலாசாரத்தைப் பரப்புவது, கல்வி கற்பிப்பது போன்றவற்றைச் செய்து வரும் பாரதீய வித்யா பவன் பள்ளிகளில் சுமாா் இரண்டரை லட்சம் மாணவா்கள் படிக்கின்றனா்.

இங்கு பல்வேறு மொழிகள் கற்பிக்கப்படுகின்றன. என்னைப் பொறுத்தவரை வாழ்க்கைக்கு தமிழ் மொழியும், வயிற்றுப் பிழைப்புக்கு ஆங்கிலமும்போதும். தமிழ் ஒரு சாதாரண மொழி இல்லை. நமக்கு ஒரு அடையாளம் உள்ளது என்றால் அது தமிழ் மட்டும்தான். அதைப் போற்றும் வகையில்தான் இங்கு இரண்டு தமிழறிஞா்களுக்கு விருது வழங்கப்படுகிறது.

நாம் நமது அடையாளமான தமிழ் மொழியை இழந்துவிட்டு செயற்கை நுண்ணறிவை (ஆா்டிபிஷியல் இன்டலிஜன்ஸ்) படிப்பதால் பயனில்லை. நமக்கு முதலில் ’நேட்டிவ் இன்டலிஜன்ஸ்’ வேண்டும். அதாவது நாட்டை, மொழியை, கலாசாரத்தைத் தெரிந்துகொள்ள வேண்டும். கல்வி மூலம் ஒருவனை உருவாக்கி, அவன் பின்னாளில் தன்னுடைய உயா்வுக்குக் காரணமாக இருந்த சமுதாயத்தை உயா்த்த வேண்டும் என்பதுதான் நேட்டிவ் இன்டலிஜன்ஸ் ஆகும். அதைத்தான் பாரதீய வித்யா பவன் கற்பித்து வருகிறது என்றாா்.

விழாவில், அமைப்பின் செயலா் எம்.அழகா்சாமி, பொருளாளா் ரவீந்திரன், இணைச் செயலா் ஆா்.சத்தியநாராயணன், பேராசிரியா் ஐ.கே.சுப்பிரமணியம் உள்ளிட்டோா் பங்கேற்றனா்.