``டிக்கெட் வாங்க பணம் இல்லை'' - ரயில் வீல்களுக்கிடையே அமர்ந்து 250 கி.மீ பயணம் செய்த இளைஞர்..!

மத்திய பிரதேச மாநிலத்தில் ஜபல்பூரில் எக்ஸ்பிரஸ் ரயிலின் அடியில் அமர்ந்தவாறு 250 கி.மீ பயணம் செய்த நபரால் பரபரப்பு ஏற்பட்டுள்ளது. புனேவில் இருந்து டானாபூர் வரை, ரயில் எண் 12149 டானாபூர் எக்ஸ்பிரஸ் ரயில் செல்கிறது. இந்த ரயில் மத்திய பிரதேசம் மாநிலம் ஜபல்பூர் ரயில் நிலையத்திற்கு வந்த பொழுது, ரயில்வே ஊழியர்கள் ரயில் சக்கரத்துக்கு இடையே வழக்கமான சோதனையில் ஈடுபட்டு வந்தனர். அப்போது டானாபூர் எக்ஸ்பிரஸ் ரயிலின் S4 பெட்டியின் அடியில் ஏதோ ஒன்று அசைவதை கவனித்துள்ளனர் ரயில்வே வண்டி மற்றும் வேகன் துறை ஊழியர்கள். உடனடியாக, வயர்லெஸ் தொலைதொடர்பு கருவி மூலம் லோகோ பைலட்டுக்கு தகவல் கொடுத்தனர். இதனால் அந்த எக்ஸ்பிரஸ் ரயில் உடனடியாக நிறுத்தப்பட்டது.

எக்ஸ்பிரஸ் ரயிலின் S4 பெட்டியின் அடியில் ரோலிங் ஸ்டாக் மற்றும் கீழடுக்கில் ஒருவர் அமர்ந்து பயணித்து வந்ததை கண்டுபிடித்தனர். அந்த நபர் ரயிலுக்கு அடியில் இருக்கும் சக்கரத்துக்கு இடையே உள்ள பகுதியான போகி (Bogie) என்ற இடத்தில் அமர்ந்தவாரே ஆபத்தான முறையில் 250 கிலோமீட்டர் வரை பயணம் செய்துள்ளார். இடார்சி என்ற பகுதியில் இருந்து ஜபல்பூர் வரை கிட்டத்தட்ட நான்கு மணி நேரம் ரயிலுக்கு அடியிலேயே பயணம் செய்து வந்தது தெரியவந்தது. இதனை அடுத்து அந்த நபரை ரயில்வே பாதுகாப்புப் படையிடம் (ஆர்பிஎஃப்) ரயில்வே ஊழியர்கள் ஒப்படைத்தனர்.

முதல் கட்ட விசாரணையில் அந்த இளைஞர், "ரயில் டிக்கெட் வாங்க பணம் இல்லாத காரணத்தினால் இப்படி பயணம் செய்தேன். ஜபல்பூருக்கு செல்ல வேண்டும், அதற்காக இடார்சியில் ரயிலுக்கு அடியில் அமர்ந்து பயணத்தை தொடங்கினேன்" என்று ரயில்வே துறை ஊழியர்களிடம் தெரிவித்துள்ளார்.

இது குறித்து தீவிர விசாரணை மேற்கொண்டுள்ள ரயில்வே துறை ஊழியர்கள், "அவர் மனநலம் பாதிக்கப்பட்ட நபர், அவருடைய பதில்கள் மனநலம் பாதிக்கப்பட்டவர் என்பதனை சுட்டிக்காட்டுவதாக உள்ளது" என்று தெரிவித்துள்ளனர். மேலும் அந்த நபரிடம் தொடர்ந்து விசாரணை நடைபெற்று வருவதாக தெரிவித்துள்ளனர்.