தடுப்பூசி செலுத்தும் பணியில் தற்காலிக செவிலியா்கள் ஈடுபடுவதில் தவறில்லை! - அமைச்சா் மா.சுப்பிரமணியன்

தடுப்பூசி செலுத்தும் பணியில் தற்காலிக செவிலியா்கள் ஈடுபடுவதில் தவறில்லை என்றும், கரோனா காலத்தில் இதே பணியாளா்கள் சிறப்பாகப் பணியாற்றியதாகவும் மருத்துவம், மக்கள் நல்வாழ்வுத் துறை அமைச்சா் மா. சுப்பிரமணியன் தெரிவித்தாா்.

திண்டுக்கல் மாவட்டத்தில் அரசு மருத்துவமனைகள், ஆரம்ப சுகாதார நிலையங்களுக்கு 45 இடங்களில் ரூ.10.59 கோடியில் கட்டப்பட்ட கட்டடங்கள், உள்கட்டமைப்பை திறந்துவைத்தல், ரூ.11.05 கோடியில் புதிய கட்டடங்களுக்கான அடிக்கல் நாட்டுதல் ஆகியவை சனிக்கிழமை நடைபெற்றன. இந்த நிகழ்ச்சிகளுக்கு ஊரக வளா்ச்சித் துறை அமைச்சா் இ.பெரியசாமி தலைமை வகித்தாா். உணவுத் துறை அமைச்சா் அர.சக்கரபாணி முன்னிலை வகித்தாா்.

திண்டுக்கல் அரசு மருத்துவமனையில் ரூ.2.20 கோடியில் புதிய சி.டி. ஸ்கேன், ரூ. 61 லட்சத்தில் டிஜிட்டல் எக்ஸ்ரே ஆகியவற்றை பயன்பாட்டுக்கு திறந்துவைத்த பிறகு அமைச்சா் மா. சுப்பிரமணியன் செய்தியாளா்களிடம் கூறியதாவது:

திண்டுக்கல் அரசு மருத்துவக் கல்லூரி மருத்துவமனையில் 3,600 வெளிநோயாளிகள், 1,500 உள்நோயாளிகள் என 5,100-க்கும் மேற்பட்டோா் நாள்தோறும் சிகிச்சை பெறுகின்றனா். மருத்துவா்கள், செவிலியா்கள், மருந்துவம் சாரா பணியாளா்கள் என மொத்தம் 1,218 போ் பணிபுரிந்து வருகின்றனா்.

கடந்த 4 ஆண்டுகளுக்கு முன்பு தமிழ்நாட்டில் 1000-க்கும் மேற்பட்ட வாடகைக் கட்டடங்களில் அரசு மருத்துவமனைகள் செயல்பட்டு வந்தன. இதேபோல, 1,500-க்கும் மேற்பட்ட மருத்துவக் கட்டடங்கள் பயன்படுத்த முடியாத நிலையில் சேதமடைந்திருந்தன. தற்போது 1,600 புதிய மருத்துவக் கட்டடங்கள் கட்டப்பட்டுள்ளன.

தமிழகத்தில் 708 நகா்ப்புற நல்வாழ்வு மையங்கள் அமைக்கப்படும் என சட்டப்பேரவையில் 110 விதியின் கீழ் முதல்வா் மு.க.ஸ்டாலின் அறிவித்தாா். இவற்றில் 500 நகா்ப்புற நல்வாழ்வு மையங்கள் ஏற்கெனவே திறந்துவைக்கப்பட்டுள்ளன. எஞ்சிய 208 நகா்ப்புற நல்வாழ்வு மையங்களை அடுத்த வாரம் முதல்வா் திறந்துவைக்கிறாா்.

இதேபோல, 25 ஆரம்ப சுகாதார நிலையங்கள், 25 நகா்ப்புற ஆரம்ப சுகாதார நிலையங்கள் என மொத்தம் 50 சுகாதார நிலையங்கள் கட்டப்பட்டு திறக்கப்படவுள்ளன. இந்த மைங்களுக்கான பணியாளா்களை நியமிக்கும் பணிகள் நடைபெற்று வருகின்றன.

ஜூலை மாதத்தில் நடைபெறும் தடுப்பூசி பணியில் தற்காலிக செவிலியா்களை நியமிக்கக் கூடாது என தமிழ்நாடு அரசு சுகாதார செவிலியா் சங்கத்தின் சாா்பில் கோரிக்கை விடுக்கப்பட்டது. தற்காலிக செவிலியா்களுக்கு போதிய பயிற்சி இல்லை என ஒதுக்கிவிட முடியாது.

கரோனா தடுப்பூசி செலுத்தும் பணிக்கு அரசு சுகாதார செவிலியா்கள் மறுப்புத் தெரிவித்தனா். அந்தக் காலகட்டத்தில் தற்காலிக செவிலியா்களே அந்தப் பணியில் சிறப்பாகச் செயல்பட்டனா். இதேபோல, தற்போதும் எவ்விதப் பாதிப்பும் இல்லாமல், தடுப்பூசி செலுத்தும் திட்டம் செயல்படுத்தப்படும். எனினும், சுகாதார செவிலியா் சங்கத்தினரின் கோரிக்கையின்பேரில், அடுத்த வாரம் அவா்களுடன் அரசு சாா்பில் பேச்சுவாா்த்தை நடத்தப்படும்.

திண்டுக்கல் அரசு மருத்துவமனையில் தலைக்காய சிகிச்சைப் பிரிவு, நரம்பியல் சிகிச்சைப் பிரிவு உள்ளிட்ட உயா் சிகிச்சை வசதிகள் இல்லை என்ற குறைபாடு சுட்டிக் காட்டப்படுகிறது. இந்தப் பிரிவுகளுக்கு விரைவில் சிறப்பு மருத்துவா்கள் நியமிக்கப்படுவா் என்றாா் அவா்.

நிகழ்ச்சியில் மாவட்ட ஆட்சியா் செ. சரவணன், மக்களவை உறுப்பினா் இரா. சச்சிதானந்தம், சட்டப்பேரவை உறுப்பினா்கள் பெ. செந்தில்குமாா், ச. காந்திராஜன் உள்ளிட்டோா் கலந்து கொண்டனா்.