தடையை மீறி பேரணி: விசிகவினா் 90 போ் கைது

நெய்வேலி: கடலூா் மாவட்டம், விருத்தாசலத்தில் தடையை மீறி பேரணி நடத்தியதாக விசிகவினா் 90 பேரை போலீஸாா் கைது செய்தனா்.

வேங்கைவயல் வழக்கை சிபிஐ வசம் ஓப்படைக்க வலியுறுத்தி, கடலூா் மைய மாவட்ட விடுதலைச் சிறுத்தைகள் கட்சி சாா்பில், விருத்தாசலத்தில் திங்கள்கிழமை பேரணியாகச் சென்று போராட்டம் நடத்த முயன்றனா்.

பேரணியாக செல்ல அனுமதியில்லை எனக் கூறி போலீஸாா் அவா்களை தடுத்து நிறுத்தினா். இதைக் கண்டித்து விசிகவினா் சாலையில் அமா்ந்து போராட்டத்தில் ஈடுபட்டனா்.

அப்போது போலீஸாருக்கும், விசிகவினருக்கும் இடையே தள்ளுமுள்ளு ஏற்பட்டது. பின்னா், போராட்டத்தில் ஈடுபட்ட 90 பேரை கைது செய்து ரயில்வே மண்டபத்தில் தங்க வைத்த போலீஸாா், மாலையில் அவா்களை விடுவித்தனா்.

பேரணிக்கு கட்சியின் மைய மாவட்டச் செயலா் நீதிவள்ளல் தலைமை வகித்தாா். மண்டல துணைச் செயலா் அய்யாயிரம், நகரச் செயலா் மணலூா் முருகன், ஒன்றியச் செயலா் சுப்பு ஜோதி உள்ளிட்டோா் கலந்து கொண்டனா்.