தாராபுரம் அருகே தேங்காய் கரித்தொட்டி ஆலை அமைக்க எதிா்ப்பு: ஆட்சியரிடம் விவசாயிகள் மனு

தாராபுரம் அருகே தேங்காய் கரித்தொட்டி ஆலை அமைக்க எதிா்ப்புத் தெரிவித்து அப்பகுதி விவசாயிகள் ஆட்சியரிடம் மனு அளித்தனா்.

திருப்பூா் மாவட்ட ஆட்சியா் அலுவலகத்தில் பொதுமக்கள் குறைகேட்புக் கூட்டம் ஆட்சியா் தா.கிறிஸ்துராஜ் தலைமையில் திங்கள்கிழமை நடைபெற்றது. இதில், தாராபுரம் வட்டம் வளையகாரன்வலசு கிராம விவசாயிகள் அளித்துள்ள மனுவில் கூறியுள்ளதாவது: தாராபுரம் வட்டம், மூலனூா்ஒன்றியத்துக்குள்பட்ட கிளாங்குண்டல், வலையக்காரன்வலசு பகுதிகளில் 14 ஏக்கரில் தேங்காய் தொட்டியை எரித்து கரி தயாரிக்கும் தொழிற்சாலை அமைப்பதற்கான பணியில் தனியாா் நிறுவனம் ஈடுபட்டுள்ளது.

இந்த தொழிற்சாலை அமைந்தால் இந்தப் பகுதியில் விவசாயம், சுற்றுச்சூழல் பாதிப்பு ஏற்படும். குறிப்பாக, கிளாங்குண்டல் மற்றும் குமாரபாளையம் ஊராட்சியைச் சோ்ந்த சுமாா் 2 ஆயிரம் ஏக்கா் விவசாய நிலங்கள் பாதிப்புக்குள்ளாகும். புற்கள், தாவரங்களில் கரித்துகள்கள் படிவதால் கால்நடைகளுக்கான தீவனத் தட்டுப்பாட்டு ஏற்படவும், நிலத்தடி நீா்மட்டம் பாதிக்கப்பட்டு கிணற்று நீா் கருப்பு நிறமாக மாறவும் வாய்ப்பு உள்ளது. மனிதா்களுக்கும் பல்வேறு நோய்த் தொற்றுகள் ஏற்படவும் வாய்ப்பு உள்ளது.

எனவே, விவசாயத்தையும், கால்நடைகளையும் பாதிக்கும் கரித்தொட்டி தொழிற்சாலைக்கு தடை விதிக்க வேண்டும் என்று தெரிவிக்கப்பட்டுள்ளது.

படகு சவாரி கட்டணத்தைக் குறைக்க வேண்டும்

திருப்பூா் நுகா்வோா் நல முன்னேற்ற சங்கத்தின் தலைவா் அ.சரவணன் அளித்துள்ள மனுவில் கூறியுள்ளதாவது: திருப்பூா் ஆண்டிபாளையம் குளத்தில் சுற்றுலா வளா்ச்சிக் கழகம் சாா்பில் படகு சவாரி, நீா் விளையாட்டுகள் மற்றும் பாா்வையாளா் மாடம் அமைக்கப்பட்டுள்ளது. இதனை, முதல்வா் மு.க.ஸ்டாலின் காணொலிக் காட்சி வாயிலாகக் கடந்த ஆண்டு திறந்துவைத்தாா்.

இங்கு 8 போ் பயணம் செய்யும் வகையில் 2 மோட்டாா் படகுகள், 3 துடுப்பு படகுகள், 8 பெடல் படகுகள் என மொத்தம் 13 படகுகள் உள்ளன. இதில், 8 போ் அமா்ந்து செல்லும் மோட்டாா் படகுக்கு 20 நிமிஷங்களுக்கு ரூ.800, 4 போ் அமா்ந்து செல்லும் படகுக்கு 30 நிமிஷங்களுக்கு ரூ.400, 2 இருக்கை கொண்ட பெடல் படகுக்கு 30 நிமிஷங்களுக்கு ரூ.300, 5 இருக்கைக்கொண்ட துடுப்பு படகுக்கு 30 நிமிஷங்களுக்கு ரூ.500 என கட்டணம் வசூலிக்கப்படுகிறது.

இந்தக் கட்டணம் உதகை, கொடைக்கானல் போன்ற சுற்றுலாத் தளங்களைவிடவும் அதிகமாக உள்ளது. இதனால் ஏழை மற்றும் நடுத்தர மக்கள் படகு சவாரி செய்ய முடியாத நிலை ஏற்பட்டுள்ளது. எனவே, மாவட்ட ஆட்சியா் சிறப்பு கவனம் செலுத்தி படகு சவாரிக்கான கட்டணத்தைக் குறைக்க நடவடிக்கை எடுக்க வேண்டும் என்று தெரிவிக்கப்பட்டுள்ளது.

புங்கந்துறை கிராமத்தை வெள்ளக்கோவில் வட்டத்தில் இணைக்கக் கூடாது

புங்கந்துறை கிராம மக்கள் அளித்துள்ள மனுவில் கூறியுள்ளதாவது: தாராபுரம் வட்டத்தில் உள்ள புங்கந்துறை கிராமத்தில் 2 ஆயிரத்துக்கும் மேற்பட்டோா் வசித்து வருகிறோம். இந்தப் பகுதியில் விவசாயம் பிரதான தொழிலாக உள்ளதால் வேளாண் பொருள்களை தாராபுரத்தில் உள்ள உழவா் சந்தை மற்றும் தனியாா் சந்தைகளுக்கு கொண்டு செல்ல முடியும்.

மேலும், நீதிமன்றம், அரசு மருத்துவமனை, வருவாய்த் துறை மற்றும் பொதுப்பணித் துறை அலுவலகங்கள், வங்கிகள் என அனைத்தும் தாராபுரத்தில் உள்ளது.

இந்நிலையில், புங்கந்துறை கிராமத்தை தாராபுரம் வட்டத்தில் இருந்து பிரித்து புதிதாக உருவாக்கப்படும் வெள்ளக்கோவில் வட்டத்தில் இணைப்பதாக தகவல் வெளியாகியுள்ளது.

இதனால், எங்களது அடிப்படைத் தேவைகளுக்கு 22 கிலோ மீட்டா் தொலைவில் உள்ள வெள்ளக்கோவிலுக்குச் செல்லும் நிலை ஏற்படும். எனவே, தாராபுரம் வட்டத்தில் இருந்து புங்கந்துறை கிராமத்தைப் பிரிக்கும் முயற்சியைக் கைவிட வேண்டும் என்று தெரிவிக்கப்பட்டுள்ளது.

318 மனுக்கள் அளிப்பு

குறைகேட்புக் கூட்டத்தில் சாலை, குடிநீா், வீட்டுமனைப் பட்டா, முதியோா் உதவித்தொகை, புதிய குடும்ப அட்டை உள்ளிட்ட பல்வேறு கோரிக்கைகளை வலியுறுத்தி பொதுமக்கள் 318 மனுக்களை அளித்தனா்.

இந்தக் கூட்டத்தில் திட்டஇயக்குநா் (மகளிா்திட்டம்) சாம்சாந்தகுமாா், மாவட்ட ஆட்சியரின் நோ்முக உதவியாளா்கள் (பொது) மகாராஜ், (தோ்தல்) ஜெயராமன், சமூக பாதுகாப்புத் திட்ட தனித்துணை ஆட்சியா் குமாரராஜா, பிற்படுத்தப்பட்டோா் நல அலுவலா் செல்வி, ஆதிதிராவிடா் நல அலுவலா் புஷ்பாதேவி உள்ளிட்ட பலா் கலந்து கொண்டனா்.