காந்தியின் ஹிந்துத்துவ கருத்தியலில் காங்கிரஸ் நம்பிக்கை கொண்டுள்ளது: முதல்வா் சித்தராமையா

பெலகாவி: மகாத்மா காந்தியின் ஹிந்துத்துவ கருத்தியலில் காங்கிரஸ் நம்பிக்கை கொண்டுள்ளது என்று முதல்வா் சித்தராமையா தெரிவித்தாா்.

1924ஆம் ஆண்டு டிச. 26, 27ஆம் தேதிகளில் பெலகாவியில் காந்தி தலைமையில் 39ஆவது காங்கிரஸ் மாநாடு நடந்தது. இந்த மாநாட்டின் நூற்றாண்டு விழாவைக் கொண்டாடும் வகையில், பெலகாவியில் சட்டப்பேரவை மற்றும் தலைமைச்செயலகம் அமைந்துள்ள சுவா்ண விதான சௌதா வளாகத்தின் முன் மகாத்மா காந்தியின் சிலை திறக்கப்பட்டது.

பெலகாவியில் செவ்வாய்க்கிழமை நடந்த விழாவில் காந்தி சிலையை மாநிலங்களவை எதிா்க்கட்சித் தலைவரும், அகில இந்திய காங்கிரஸ் கட்சித் தலைவருமான மல்லிகாா்ஜுன காா்கே திறந்து வைத்தாா். இந்த விழாவில் முதல்வா் சித்தராமையா, துணை முதல்வா் டி.கே.சிவகுமாா், எம்.பி.க்கள் பிரியங்கா காந்தி, கே.சி.வேணுகோபால், ரண்தீப்சிங் சுா்ஜேவாலா, அமைச்சா்கள் எச்.கே.பாட்டீல், சரணபிரகாஷ் பாட்டீல், பேரவைத் தலைவா் யூ.டி.காதா், மேலவைத் தலைவா் பசவராஜ் ஹோரட்டி உள்ளிட்டோா் கலந்துகொண்டனா்.

இந்த விழாவில் முதல்வா் சித்தராமையா பேசியது:

மகாத்மா காந்தியை ஹிந்துகளுக்கு எதிரானவா் போல பாஜக சித்தரித்து வருகிறது. ஆனால், அந்த விமா்சனம் 100 சதவீதம் பொய்யானது. ராமபிரானின் நாமத்தை எப்போதும் உச்சரித்து வந்தவா் காந்தி. நாதுராம் கோட்ஸே துப்பாக்கியால் சுட்டுக்கொன்றபோதும், ‘ஹே ராம்’ என்று காந்தி கூறினாா். காந்தி தீவிரமான ஹிந்துவாக இருந்தாா் என்பதற்கு இதைவிட சிறந்த எடுத்துக்காட்டை கூறமுடியாது. மகாத்மா காந்தி ஹிந்து மதத்திற்கு எதிராக இருந்தது கிடையாது. ஆனால், ஹிந்து மதத்தில் சீா்திருத்தங்களைக் கொண்டுவர விரும்பினாா். ஹிந்துக்களும், முஸ்லிம்களும் சகோதரா்களைப் போல இருக்க வேண்டும் என்பதில் காந்தி உறுதியாக இருந்தாா்.

காந்தியின் ஹிந்துத்துவ கொள்கையில் காங்கிரஸ் நம்பிக்கை கொண்டுள்ளது. ஆனால், சமுதாயத்தை பிளவுப்படுத்துவதில் பாஜக நம்பிக்கை கொண்டுள்ளது. பாஜகவினா் மனுவாதிகள். இந்திய அரசமைப்புச் சட்டத்தை நாங்கள் பின்பற்றுகிறோம். ஆனால், இதற்கு எதிராக பாஜக செயல்பட்டு வருகிறது. எனவே, அரசமைப்புச் சட்டத்தை பாதுகாத்து, ஜனநாயகத்தை காப்பாற்ற வேண்டும். அரசமைப்புச் சட்டத்தை நாம் காப்பாற்றினால், அது நம்மை காப்பாற்றும். கடந்த பல ஆண்டுகளாக அரசமைப்புச் சட்டத்தை பலவீனப்படுத்த பாஜக முயற்சித்து வருகிறது. இந்த முயற்சியை முறியடிக்க வேண்டும்.

சுதந்திரப் போராட்டத்திற்கு மட்டும் தன்னை வரையறுத்துக் கொள்ளாமல், அரசு நிா்வாகத்திலும் நல்ல யோசனைகளை அளித்து வந்திருக்கிறாா். அமைச்சா்கள் எப்படி செயல்பட வேண்டும் என்பதையும் காந்தி விளக்கியிருக்கிறாா் என்றாா்.

அகில இந்திய காங்கிரஸ் கட்சித் தலைவா் மல்லிகாா்ஜுன காா்கே பேசியதாவது:

அரசமைப்புச் சட்டம் இல்லாவிட்டால், நமது நாட்டில் அராஜகம் தலைவிரித்தாடும். அதன் காரணமாகவே, அண்மைக் காலமாக காந்தியை மக்கள் நினைத்து பாா்ப்பதோடு, அவரை பாராட்டுகிறாா்கள். காந்தியடிகளின் பணியை, தியாகங்களை, பங்களிப்பை மக்கள் போற்றுகிறாா்கள் என்றாா்.