தாராபுரம் அருகே விளைநிலங்களை சேதப்படுத்தும் வன விலங்குகளைக் கட்டுப்படுத்துவது குறித்த ஆலோசனைக் கூட்டம் அமைச்சா் என்.கயல்விழி செல்வராஜ் தலைமையில் திங்கள்கிழமை நடைபெற்றது.
தாராபுரம் வருவாய் கோட்டாட்சியா் அலுவலகத்தில் நடைபெற்ற
இந்த கூட்டத்துக்கு, திருப்பூா் மாவட்ட ஆட்சியா் தா.கிறிஸ்துராஜ், மாவட்ட வன அலுவலா் தேவேந்திர குமாா் மீனா ஆகியோா் முன்னிலை வகித்தனா்.
கூட்டத்துக்குத் தலைமை வகித்த மனிதவள மேலாண்மைத் துறை அமைச்சா் என்.கயல்விழி செல்வராஜ் பேசியதாவது:
திருப்பூா் மாவட்டம், தாராபுரம் வட்டம், ஊத்துப்பாளையம், சென்னாக்கல்பாளையம், தளவாய்பட்டணம் ஆகிய கிராமங்களில் வனத் துறைக்கு சொந்தமான காப்புக்காடுகளில் வனவிலங்குகள் உள்ளன. இந்த வனவிலங்குகள் அருகில் உள்ள விளைநிலங்களை சேதப்படுத்துவதாக அப்பகுதி விவசாயிகள் சாா்பில் புகாா்கள் வரத்தொடங்கியுள்ளது.
இதனடிப்படையில், வனவிலங்குகளின் நடமாட்டத்தைக் கட்டுப்படுத்துவது குறித்த ஆலோசனைக் கூட்டம் நடைபெறுகிறது. வனவிலங்குகளின் நடமாட்டத்தைக் கட்டுப்படுத்த விளைநிலங்களின் அருகில் உள்ள காப்புக்காடுகளில் 8 கிலோ மீட்டா் சுற்றளவுக்கு வேலி அமைக்க வேண்டும்.
வனவிலங்குகளை வனப் பகுதிகளுக்கு இடம்மாற்றம் செய்யவும், பாதிக்கப்பட்ட விளைநிலங்களுக்கு இழப்பீடு வழங்கவும் நடவடிக்கை மேற்கொள்ள வேண்டும். மேலும், கூடுதல் வனப் பணியாளா்களை நியமித்து வனவிலங்குகளிடமிருந்து விளைநிலங்களுக்கு பாதுகாப்பு அளிக்கவும் நடவடிக்கை மேற்கொள்ள வன அலுவலா்களுக்கு அறிவுறுத்தப்பட்டுள்ளது என்றாா்.
இந்தக் கூட்டத்தில், தாராபுரம் வருவாய் கோட்டாட்சியா் ஃபெலிக்ஸ்ராஜா, காங்கயம் வனச் சரகா் சுரேஷ்கிருஷ்ணன், தாராபுரம் ஊராட்சி ஒன்றியக் குழுத் தலைவா் எஸ்.வி.செந்தில்குமாா், தாராபுரம் வட்டாட்சியா் திரவியம் உள்ளிட்ட பலா் கலந்து கொண்டனா்.
