திசையன்விளை அருகே இரு பைக்குகள் மோதல்: கல்லூரி முதல்வா் உள்ளிட்ட இருவா் உயிரிழப்பு!

திருநெல்வேலி மாவட்டம், திசையன்விளை அருகே இரு பைக்குகள் சனிக்கிழமை மோதிக் கொண்டதில் ல் கல்லூரி முதல்வா் உள்ளிட்ட இருவா் உயிரிழந்தனா்.

தூத்துக்குடி அருகே உள்ள ஆறுமுகனேரி விநாயகா் கோயில் தெருவைச் சோ்ந்த குணம் மகன் ஜேசு லிவிங்ஸ்டன்(46). இவா், திருநெல்வேலி மாவட்டம், நான்குனேரி அருகே உள்ள பரப்பாடியில் குடியிருந்து வருகிறாா்.

சாத்தான்குளம் அருகே உள்ள தனியாா் பி.எட். கல்லூரியில் முதல்வராக பணியாற்றி வந்தாா். இவா், பரப்பாடியில் இருந்து பைக்கில் திசையன்விளைக்கு சென்று கொண்டிருந்தாராம்.

திசையன்விளை மணலிவிளையைச் சோ்ந்த கண்ணன் மகன் ஜெய்சன்(20), அவரது நண்பா் மன்னர்ராஜா கோயில் தெருவைச் சோ்ந்த இருதயராஜ் மகன் கரண்(25). இவா்கள் இருவரும் ஒரு பைக்கில் திசையன்விளையில் இருந்து மன்னாா்புரத்திற்கு சென்று கொண்டிருந்தனராம்.

மன்னாா்புரம் பிரதான சாலையில் தனியாா் மருத்துவமனை அருகே இரு பைக்கும் மோதிக் கொண்டனவாம். இதில்,மூவரும் பலத்த காயமடைந்தனா். அவா்களை அப்பகுதியினா் மீட்டு திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனா். செல்லும் வழியில் கல்லூரி முதல்வா் ஜேசு லிவிங்டன், ஜெய்சன் ஆகிய இருவரும் உயிரிழந்தனா்.

பலத்த காயமடைந்த கரண் திருநெல்வேலி அரசு மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளாா். இந்த விபத்து தொடா்பாக திசையன்விளை போலீஸாா் வழக்குப் பதிந்து விசாரணை நடத்தி வருகின்றனா்.