திருப்பத்தூர்: நெடுஞ்சாலையில் தொடரும் விபத்துகள் - நடவடிக்கை எடுப்பார்களா அதிகாரிகள்?

திருப்பத்தூர் மாவட்டம் ஜோலார்பேட்டை அடுத்த ரெட்டியூர் அருகே, நான்கு வழிச் சாலை அமைத்துக் கிட்டத்தட்ட இரண்டு வருடங்களுக்கு மேல் ஆகிறது.

இந்த நெடுஞ்சாலையில் (179A) ஆம்பூர்,வேலூர், சென்னை செல்ல வாகன ஓட்டிகள் பயன்படுத்தி வரும் நிலையில் விபத்துகள் தொடர்ந்து நேர்ந்து வருகிறது. முக்கியமாக வாகனங்கள் செல்லும் இடத்தில் இரண்டு பக்கமும் ரெட்டியூர், சின்னகம்மியம்பட்டு,குன்டிமாரியம்மன் வட்டம், காந்தி நகர் போன்ற வெவ்வேறு ஊர்கள் அமைந்துள்ளது. இதனால் இந்த சாலையில் வாகன ஓட்டிகளைத் தாண்டி பொதுமக்கள் நடமாட்டமும் அதிகம் காணப்படும்.

காலை மற்றும் மாலை வேளைகளில் பள்ளி கல்லூரி மாணவர்கள், வெளியூருக்கு வேலைக்குச் செல்லும் பொதுமக்கள் அனைவரும் இங்கு நின்றுதான் பயணம் மேற்கொண்டு வருகின்றனர். இதுபற்றி அங்கிருந்த பொதுமக்களிடம் விசாரித்தப்போது,'நெடுஞ்சாலை என்பதால் வாகனங்கள் மிகவும் வேகமாக வருகிறது. மாணவர்கள் மற்றும் பொதுமக்கள் சாலையைக் கடக்காமல் பல முறை திக்குமுக்காடுகின்றோம்.

இதனால் பல முறை விபத்துகள் நேர்ந்து வருகிறது. அண்மையில் கூட ஸ்கூட்டியில் பெண் ஒருவர் சாலையைக் கடக்கும்போது நான்கு சக்கர வாகனம் இடித்துவிட்டு நிற்காமல் சென்றது. இதுபோன்று இங்கு இரண்டு வருடங்களில் பல அசம்பாவிதங்கள் நடந்து கொண்டுதான் இருக்கிறது. இவ்விடத்தில் ஒரு பேரிகார்டு இருந்திருந்தால் இது போன்று நடந்திருக்காது' என்று வேதனையுடன் கூறினர்.

இது குறித்து அந்த ரெட்டியூர் பஞ்சாயத்துத் தலைவர் மூர்த்தியிடம் தொலைப்பேசியில் தொடர்புகொண்டு பேசினோம் "ஆமாம், சாலையில் விபத்துகள் அதிகளவு நடந்து கொண்டுதான் இருக்கிறது. இதைத் தடுக்கும் வகையில் உயர் அதிகாரிகளுக்கு இந்த சூழலைத் தெளிவாக எடுத்துக் கூறியுள்ளோம் விரைந்து நடவடிக்கை வழிவகை செய்கிறோம்" என்று கூறினார்.