ராமநாதபுரம்: அரசு மருத்துவமனையில் தீ விபத்து; உயிர்தப்பிய நோயாளிகள்... நள்ளிரவில் பரபரப்பு!

ராமநாதபுரம் நகர் பகுதியில் இயங்கி வந்த அரசு தலைமை மருத்துவமனை, ராமநாதபுரம் அரசு மருத்துவக் கல்லூரி மருத்துவமனையாக தரம் உயர்த்தப்பட்டு இயங்கி வருகிறது. 5 தளங்களுடன் பல்நோக்கு சிகிச்சை மையமாக செயல்பட்டு வரும் இங்கு 500 படுக்கை வசதி உள்ளது. ராமநாதபுரம் மாவட்ட சுற்றுவட்டார பகுதிகளைச் சேர்ந்த சுமார் 350 பேர் உள்நோயாளிகளாக பல்வேறு சிகிச்சைகளுக்காக அனுமதிக்கப்பட்டுள்ளனர். இவர்களை தவிர நாள்தோறும் ஆயிரத்திற்கும் மேற்பட்ட புற நோயாளிகளும் சிகிச்சைக்காக வந்து செல்கின்றனர்.

இந்நிலையில் நேற்று இரவு 12 மணி அளவில் மருத்துவமனையின் இரண்டாவது தளத்தில் உள்ள இன்வெர்டர் அறையில் திடீரென ஏற்பட்ட மின்கசிவு காரணமாக தீ விபத்து ஏற்பட்டு, மின்சார வயர்கள் எரிந்து புகை வெளியானது. நேரம் செல்ல செல்ல புகையின் தாக்கம் அதிகரிக்கவே அங்கு அனுமதிக்கப்பட்டிருந்த அறுவை சிகிச்சை நோயாளிகளுக்கு மூச்சுத்திணறல் ஏற்பட்டுள்ளது. இதனால் அதிர்ச்சி அடைந்த மருத்துவமனை ஊழியர்கள், மருத்துவமனைக்கு செல்லும் மின்சாரத்தை துண்டித்தனர்.

இதுகுறித்து தகவல் அறிந்த தீயணைப்பு துறையினர் தீ விபத்து நிகழ்ந்த 2 வது தளத்திற்கு சென்று தீ அணைப்பு பணியை மேற்கொண்டனர். மருத்துவமனையில் தீ விபத்து நிகழ்ந்த செய்தி அறிந்த சமூக ஆர்வலர்கள், காவல்துறையினர், மற்றும் மருத்துவமனை ஊழியர்கள் டார்ச் லைட் மற்றும் அவசர விளக்குகளை பயன்படுத்தி இரண்டாவது, மூன்றாவது மற்றும் நான்காவது தளத்தில் அனுமதிக்கப்பட்டிருந்த 50-க்கும் மேற்பட்ட நோயாளிகளை மீட்டு அவசர அவசரமாக ஸ்ட்ரெச்சர் மூலமும் தோள்களில் தூக்கிக் கொண்டும் முதல் தளத்துக்கு கொண்டு வந்தனர்.

மீட்கப்பட்டவர்களில் செயற்கை சுவாசம் பொருத்தப்பட்டிருந்த ஒரு சில நோயாளிகள் முதல் தளத்தில் உள்ள அவசர சிகிச்சை பிரிவில் சிகிச்சை அனுமதிக்கப்பட்டு, அங்கு அவர்களுக்கு தொடர் சிகிச்சை அளிக்கப்பட்டது. இதனால் இந்த விபத்தில் உயிரிழப்பு எதுவும் ஏற்படவில்லை.

ராமநாதபுரம் அரசு மருத்துவக் கல்லூரி மருத்துவமனையில் நடந்த தீ விபத்து குறித்து அறிந்த மாவட்ட ஆட்சியர் சிம்ரன் ஜீத் சிங் கலோன் மற்றும் மாவட்டக் காவல் கண்காணிப்பாளர் சந்தீஷ் ஆகியோர் மருத்துவமனைக்கு உடனடியாக வருகை தந்தனர். தீ விபத்து ஏற்பட்ட இரண்டாவது தளத்தில் உள்ள இன்வெர்டர் அறை மற்றும் நோயாளிகள் அனுமதிக்கபட்டுள்ள அறைகளை பார்வையிட்ட அவர்கள், நோயாளிகளின் உறவினர்களிடம் விபத்து குறித்து கேட்டறிந்தனர்.

நள்ளிரவில் அரசு மருத்துவக் கல்லூரியில் நிகழ்ந்த இந்த தீ விபத்தினை தொடர்ந்து, அங்கு உள் நோயாளிகளாக அனுமதிக்கப்பட்ட நோயாளிகளின் உறவினர்கள் மற்றும் மருத்துவமனை ஊழியர்களின் உறவினர்கள் அதிக அளவில் திரண்டதால் இரவு முழுவதும் பரபரப்பு நிலவியது.