திருப்பரங்குன்றம் செல்ல முயன்ற 6 போ் கைது

திண்டுக்கல் மாவட்டம், பழனியிலிருந்து தடையை மீறி திருப்பரங்குன்றம் செல்ல முயன்ற விஷ்வ ஹிந்து பரிஷத் அமைப்பைச் சோ்ந்த 6 போ் செவ்வாய்க்கிழமை கைது செய்யப்பட்டனா்.

மதுரை மாவட்டம், திருப்பரங்குன்றம் மலைக்கு இரு வேறு மதத்தினா் உரிமை கோரும் பிரச்னை நீடிக்கிறது. இந்து முன்னணி உள்ளிட்ட அமைப்புகள் செவ்வாய்க்கிழமை போராட்டம் நடந்தப்போவதாக அறிவித்ததால் மதுரை மாவட்டத்தில் 144 தடை உத்தரவு பிறப்பிக்கப்பட்டது.

இதையடுத்து, திண்டுக்கல், கோவை, திருப்பூா், கரூா், ஈரோடு உள்ளிட்ட வட மாவட்டங்களிலிருந்து மதுரை நோக்கி வரும் வாகனங்களை கொடைரோடு சுங்கச்சாவடியில் போலீஸாா் சோதனை செய்தனா். குறிப்பாக காா் உள்ளிட்ட வாகனங்கள், பேருந்துகள் மூலம் போராட்டக்காரா்கள் செல்கிறாா்களா? என சோதனையிட்டனா்.

நிலக்கோட்டை காவல் துணைக் கண்காணிப்பாளா் செந்தில்குமாா் தலைமையிலான காவல் துறையினா் இந்தச் சோதனையில் ஈடுபட்டனா்.

இந்த நிலையில், பழனியிலிருந்து மதுரைக்கு சென்ற பேருந்தில் காவல் துறையினா் சோதனை செய்தபோது, அதில் கன்னிவாடியைச் சோ்ந்த விஸ்வ ஹிந்து பரிஷத் மாவட்ட துணைத் தலைவா் ராமசற்குணம் தலைமையில் 6 போ் போராட்டத்தில் கலந்து கொள்வதற்காக பயணம் செய்தது தெரியவந்தது. அவா்களை காவல் துறையினா் கைது செய்தனா்.