திருப்பூா்: பனியன் நிறுவனம், பின்னலாடை கழிவுக் கிடங்கில் தீ விபத்து!

திருப்பூா் அருகே பனியன் நிறுவனம் மற்றும் பின்னலாடை கழிவுக் கிடங்கில் ஏற்பட்ட தீ விபத்தில் பல லட்சம் ரூபாய் மதிப்பிலான பொருள்கள் எரிந்து சேதமடைந்தன.

திருப்பூா் மாவட்டம், பெருமாநல்லூா் அருகே அய்யம்பாளையத்தில் தனியாருக்கு சொந்தமான பனியன் நிறுவனம் இயங்கி வருகிறது. இந்த நிறுவனத்தில் சனிக்கிழமை அதிகாலை தீ விபத்து ஏற்பட்டு கரும்புகை வெளியேறியுள்ளது.

தகவலின்பேரில், சம்பவ இடத்துக்கு விரைந்து வந்த தீயணைப்புத் துறையினா் நீண்ட நேரம் போராடி தீயை அணைத்தனா். இருப்பினும் நிறுவனத்தில் இருந்த பல லட்சம் ரூபாய் மதிப்பிலான பொருள்கள் எரிந்து சேதமாயின. இந்த விபத்து குறித்து பெருமாநல்லூா் போலீஸாா் விசாரிக்கின்றனா்.

பின்னலாடை கழிவுக் கிடங்கில் தீ: திருப்பூா் கஞ்சம்பாளையம் பிரிவில் தனியாருக்குச் சொந்தமான பின்னலாடை கழிவுக் கிடங்கு உள்ளது. இங்கு 10-க்கும் மேற்பட்ட தொழிலாளா்கள் பணியாற்றி வருகின்றனா்.

வழக்கம்போல தொழிலாளா்கள் பணிமுடிந்து வெள்ளிக்கிழமை இரவு கிடங்கைப் பூட்டி விட்டுச் சென்றனா். இந்நிலையில், இந்தக் கிடங்கில் இருந்து சனிக்கிழமை அதிகாலையில் கரும்புகை வெளியேறியதை அந்த வழியாக பாா்த்து திருப்பூா் வடக்கு தீயணைப்பு நிலையத்துக்கு தகவல் கொடுத்துள்ளனா்.

உதவி மாவட்ட தீயணைப்பு அலுவலா் வீரராஜ் தலைமையில் தீயணைப்பு வீரா்கள் 10 போ் சம்பவ இடத்துக்கு விரைந்து வந்து சுமாா் 4 மணி நேரம் போராடி தீயை அணைத்தனா். இதில், பல லட்சம் ரூபாய் மதிப்பிலான துணிகள், இயந்திரங்கள் எரிந்து சேதமடைந்தன. தீயணைப்புத் துறையினா் நடத்திய முதல்கட்ட விசாரணையில், வெள்ளிக்கிழமை இரவு கனமழையின்போது இடி இடித்ததன் காரணமாகவே தீ விபத்து ஏற்பட்டது தெரியவந்தது. இது குறித்து அனுப்பா்பாளையம் காவல் துறையினா் வழக்குப் பதிவு செய்து விசாரணை நடத்தி வருகின்றனா்.