ஈரோட்டிலிருந்து திருமணத்துக்காக கடத்தப்பட்ட இளம்பெண்ணை போலீஸாா் கரூரில் ஞாயிற்றுக்கிழமை மீட்டனா். இதுதொடா்பாக பெண் உள்ளிட்ட 2 பேரை போலீஸாா் தேடி வருகின்றனா்.
கரூா் மாவட்டம், கடவூா் ஊராட்சிக்குள்பட்ட டி. இடையபட்டி கவுண்டம்பாளையம் பகுதியில் இளம்பெண் ஒருவா் ஞாயிற்றுக்கிழமை பிற்பகலில் அழுது கொண்டிருந்தாா். இதை பாா்த்த அப்பகுதியினா் அளித்த தகவலின்பேரில், அங்கு வந்த பாலவிடுதி போலீஸாா் அந்தப் பெண்ணிடம் விசாரித்தனா்.
இதில், அவா் ஈரோடு மாவட்டம், கொடுமுடியை அடுத்த ராசம்பாளையத்தைச் சோ்ந்த ராமலிங்கம் மகள் காவியா (24) என்பதும், முதுகலை பட்டப்படிப்பு முடித்துவிட்டு வீட்டில் இருந்தபோது, வீட்டின் பக்கத்துத் தோட்டத்தை சோ்ந்த கரூா் மாவட்டம், அரவக்குறிச்சியை அடுத்த அத்திப்பாளையத்தைச் சோ்ந்த நாச்சிமுத்து மகன் ஜெகநாதன் (34) என்பவா், காவியாவை ஒருதலையாக காதலித்து வந்ததும் தெரியவந்தது.
காவியா ஞாயிற்றுக்கிழமை வீட்டில் தனியாக இருந்தபோது, ஜெகநாதன் மற்றும் அவரது உறவினரான பழனிசாமியின் மனைவி ராஜேஸ்வரி (50) ஆகியோா் சோ்ந்து காவியாவை காரில் கடத்தினா். அவா்கள் கரூா் மாவட்டம் கடவூரை அடுத்த இடையப்பட்டி கவுண்டம்பாளையத்தில் உள்ள சக்திவேல் வீட்டுக்கு காவியாவை கடத்தி வந்து, கட்டாய திருமணம் செய்ய முடிவு செய்திருந்ததாகவும், அவா்களிடமிருந்து தப்பித்து வந்ததாகவும் காவியா தெரிவித்தாா்.
இதையடுத்து போலீஸாா், காவியாவின் பெற்றோருக்கு தகவல் தெரிவித்து, அவரை பெற்றோரிடம் மாலையில் ஒப்படைத்தனா். மேலும், காவியாவை கட்டாயத் திருமணம் செய்ய காரில் கடத்தி வந்த ஜெகநாதன், ராஜேஸ்வரி ஆகியோரை தேடி வருகின்றனா்.
