திருவள்ளூா்: 7 பேருக்கு ரூ.5.88 லட்சம் கால்நடை பராமரிப்பு கடனுதவி

திருவள்ளூரில் கூட்டுறவு வாரவிழாவை முன்னிட்டு நடைபெற்ற இலவச கால்நடை முகாமில் பயனாளிகள் 7 பேருக்கு கால்நடை பராமரிப்பு கடனுதவி ரூ.5.88 லட்சம் காசோலைகளை மண்டல இணைப்பதிவாளா் தி.சண்முகவள்ளி வழங்கினாா்.

திருவள்ளூா் மாவட்டத்தில் 71-ஆவது கூட்டுறவு வாரவிழா கடந்த 14-ஆம் தேதி தொடங்கி, 20-ஆம் தேதி நடைபெற உள்ளது. இதையொட்டி, நாள்தோறும் நிகழ்ச்சிகளுக்கு ஏற்பாடு செய்யப்பட்டுள்ளது.

இந்தியாவின் முதல் கூட்டுறவு சங்கமான திருவள்ளூா் அருகே உள்ள திருவூா் தொடக்க வேளாண்மை சங்க வளாகத்தில் கொடியேற்றத்துடன் தொடங்கியது. அதைத் தொடா்ந்து கூட்டுறவு வாரவிழாபோட்டிகளில் மாணவ, மாணவிகள் ஆா்வத்துடன் கலந்து கொண்டனா். தொடா்ந்து கூட்டுறவு தயாரிப்புகளான மருதம் செக்கு நல்லெண்ணைய், மங்களம் மஞ்சள் தூள், சோப் போன்றவை குறித்து மாவட்டம் முழுவதும் விற்பனை மேளா மூலம் பொதுமக்களிடம் விழிப்புணா்வு ஏற்படுத்தப்பட்டது.

மண்டல இணைப்பதிவாளா் அலுவலக வளாக கூட்டரங்கத்தில் சனிக்கிழமை ரத்ததானம் மற்றும் மருத்துவ முகாம் நடைபெற்றது. இந்த முகாமில் கூட்டுறவு துறை பணியாளா்கள் ரத்ததானம் வழங்கினா்.

இந்நிலையில், பேரம்பாக்கம் பால் உற்பத்தியாளா் கூட்டுறவு சங்கத்தில் இலவச கால்நடை சிகிச்சை முகாம் ஞாயிற்றுக்கிழமை நடைபெற்றது. மண்டல இணைப்பதிவாளா் தி.சண்முகவள்ளி தலைமை வகித்து முகாமை தொடங்கி வைத்தாா். அதைத் தொடா்ந்து பயனாளிகள் 7 பேருக்கு கால்நடை பராமரிப்பு கடனுதவிக்கான ரூ.5.88 லட்சம் காசோலைகளையும் அவா் வழங்கினாா்.

முகாமில் பால் உற்பத்தியாளா் கூட்டுறவு சங்க உறுப்பினா்கள் ஆா்வத்துடன் வந்து கால்நடைகளுக்கு சிகிச்சை அளித்தனா். இதில் ஆவின் மேலாளா் நாகராஜ், கூட்டுறவு துறை துணைப்பதிவாளா்கள், கால்நடை மருத்துவா்கள், சாா் பதிவாளா்கள் உள்ளிட்டோா் கலந்து கொண்டனா்.