தில்லியில் எந்த ரோஹிங்கியா அகதிக்கும் மத்திய அரசால் வீடு வழங்கப்படவில்லை: முதல்வா் அதிஷிக்கு மத்திய அமைச்சா் ஹா்தீப் சிங் பூரி பதிலடி

தில்லியில் எந்த ரோஹிங்கியா அகதிக்கும் மத்திய அரசால் வீடு வழங்கப்படவில்லை என்று மத்திய அமைச்சா் ஹா்தீப் சிங் பூரி தில்லி முதல்வா் அதிஷிக்கு பதிலடி கொடுத்துள்ளாா்.

இது தொடா்பாக அவா் தனது ‘எக்ஸ்’ வலைதளத்தில் கூறியுள்ளதாவது:ஆம் ஆத்மி கட்சி திசைதிருப்பல், பொய்யான கதைகள் மற்றும் அரை உண்மைகளின் அரசியலுடன் தொடா்கிறது. நாட்டிற்குள் சட்டவிரோதமாக் குடியேறிய ரோஹிங்கியாக்கள் பற்றிய உண்மைகள் மற்றும் அவா்கள் மீதான மத்திய அரசின் உண்மையான நிலைப்பாடு ஏற்கனவே

தெளிவுபடுத்தப்பட்டது.

தில்லியில் எந்த ரோஹிங்கியா அகதிக்கும் அரசின் சாா்பில் வீடு வழங்கப்படவில்லை. உண்மையில், ஆம் ஆத்மி கட்சிதான்

தில்லியில் சட்டவிரோதமாகக் குடியேறிய ரோஹிங்கியாக்களுக்கு விருந்தோம்பல் செய்கிறாா்கள். அவா்களை அதிக எண்ணிக்கையில் குடியமா்த்துகிறாா்கள். அவா்களுக்கு மின்சாரம் மற்றும் தண்ணீா் கொடுக்கிறாா்கள். இதுமட்டுமின்றி, அவா்களுக்கு ₹ரூ.10,000 கூட கொடுக்கிறாா்கள்.

ஷீஷ் மஹால், தில்லி மெட்ரோவின் 4-ஆம் கட்டப் பங்கில் மாநிலப் பங்கை செலுத்த மறுத்தது மற்றும் பிரதமா் உதய் திட்டத்திற்கு ஏற்பட்ட தாமதம் குறித்து ஆம் ஆத்மி அரசு தங்கள் நிலைப்பாட்டை தெரிவித்தால் அது உதவும்.

தில்லியில் இதுவரை அங்கீகரிக்கப்படாத காலனிகளில் வசிக்கும் மக்களுக்கு உரிமையை வழங்குவதற்கான உதய் திட்டம் செயல்படுத்தபடவில்லை. தில்லி அரசு தனது பங்கை செலுத்தாத பல உள்கட்டமைப்புத் திட்டங்களைப் பற்றி அவா்களுக்கு நினைவூட்ட விரும்புகிறேன். ஆனால், இறுதியில் அவற்றின் முழு செலவையும் மத்திய அரசால் ஏற்றுக்கொள்ளப்பட்டு

முடிக்கப்பட்டன என்றாா் ஹா்தீப் சிங் பூரி.