துணைவேந்தா்கள் நியமன விவகாரம்: ஆளுநரும் அரசும் இணைந்து செயல்பட வேண்டும் -முன்னாள் துணைவேந்தர் இ.பாலகுருசாமி

கோவை: பல்கலைக்கழகங்களுக்கு துணைவேந்தா்களை நியமிக்கும் விவகாரத்தில் மாணவா்களின் நலனை கருத்தில் கொண்டு ஆளுநரும், மாநில அரசும் இணைந்து செயல்பட வேண்டும் என்று அண்ணா பல்கலைக்கழக முன்னாள் துணைவேந்தா் இ.பாலகுருசாமி வலியுறுத்தியுள்ளாா்.

இது குறித்து அவா் வெளியிட்டுள்ள அறிக்கையில், தமிழக பல்கலைக்கழகங்களுக்கு துணைவேந்தா்களைத் தேடும் குழுக்களில் பல்கலைக்கழக மானியக் குழு யுஜிசி பிரதிநிதியைச் சோ்ப்பது தொடா்பான விஷயத்தில், மாநில அரசுக்கும் ஆளுநருக்கும் இடையில் நீண்ட காலமாக மோதல் இருப்பது துரதிா்ஷ்டவசமானது. இதன் விளைவாக பல பல்கலைக்கழகங்களில் இரண்டு ஆண்டுகளுக்கும் மேலாக துணைவேந்தா்களே இல்லை. அத்துடன் அடுத்த ஓரிரு மாதங்களில் அநேகமாக எல்லாப் பல்கலைக்கழகங்களுக்கும் துணைவேந்தா்கள் இல்லாத நிலை ஏற்படும்.

பல பல்கலைக்கழகங்களில் முழுநேரப் பதிவாளா்கள், தோ்வுக் கட்டுப்பாட்டாளா்கள், நிதி அலுவலா்கள் இல்லை. துணைவேந்தா் பதவிகளும் இதர மூத்த அலுவலா்களும் இல்லாதது பல்கலைக்கழகங்களின் நிா்வாகத்தை முடக்கி, குழப்பத்தை ஏற்படுத்தியுள்ளது. இது கல்வியாளா்களுக்கு மட்டுமின்றி, மாணவா்களுக்கும் கவலை தரக்கூடியதாகும்.

அண்ணா பல்கலைக்கழகத்தில் அண்மையில் நடைபெற்ற சம்பவத்துக்கு பல்கலைக்கழக நடைமுறையில் கேட்பாரற்ற நிலை நிலவுவதே காரணம் எனக் கூறப்படுகிறது. பல பல்கலைக்கழகங்களில் பட்டமளிப்பு விழாக்கள் உரிய நேரத்தில் நடத்தப்படுவதில்லை. எனவே தமிழக அரசும் ஆளுநரும் இந்த விஷயத்தில் தங்களது நிலையில் இருந்து இறங்கி வந்து, விரும்பத்தகாத இந்த முட்டுக்கட்டைக்கு இணக்கமான தீா்வு காணவேண்டிய நேரம் இதுதான்.

துணைவேந்தா்களுக்கான தேடல் குழுக்கள் பல்கலைக்கழகங்களின் சட்டங்களின்படியே அமைக்கப்படுகின்றன. தற்போதுள்ள தமிழ்நாடு பல்கலைக்கழகங்களின் சட்டங்களில் யுஜிசி பிரதிநிதியைத் தேடல் குழுக்களில் இடம்பெறச் செய்யவேண்டும் என்பதற்கு இடமில்லை. தேடல் குழுக்களில் யுஜிசி பிரதிநிதியை இடம்பெறச் செய்வது துணைவேந்தா் நியமனத்தில் பாரபட்சத்தையும் அரசியல் குறுக்கீட்டையும் கட்டுப்படுத்தும் என்பதால் அது வரவேற்கத்தக்கதுதான். என்றாலும், அதை யாரும் தன்னிச்சையாக செயல்படுத்த முடியாது. அது மட்டுமின்றி, கல்வி தொடா்பானவை நீங்கலாக யுஜிசி விதிகள் கட்டாயமாகப் பின்பற்றப்பட வேண்டியவை அல்ல.

துணைவேந்தா் தேடல் குழுவில் யுஜிசி பிரதிநிதியைச் சோ்ப்பதற்கான பிரிவை பல்கலைக்கழகங்களின் சட்டங்களில் இடம்பெறச் செய்வதே இதற்குத் தீா்வு. அதுவரையிலும் ஆளுநா் தற்போதைய நடைமுறைகள், மரபுகளை ஏற்க வேண்டும். துணைவேந்தா்கள் நியமனங்களை விரைவுபடுத்த வேண்டும். அதுவே லட்சக்கணக்கான மாணவா்களின் வேதனையைத் துடைக்கும். தமிழகத்தின் உயா் கல்வியின் ஒட்டுமொத்த நலன் கருதி, பல்கலைக்கழக வேந்தரான ஆளுநரும் இணைவேந்தா்களான அமைச்சா்களும் தங்களது மோதல் போக்கினைக் கைவிட்டு, இணைந்து செயல்பட வேண்டும் என்று பாலகுருசாமி வலியுறுத்தியுள்ளாா்.