தென்காசி அரசு மருத்துவமனையில் குழந்தை இறந்ததால் உறவினா்கள் போராட்டம்

தென்காசி மாவட்ட அரசு தலைமை மருத்துவமனையில் அனுமதிக்கப்பட்ட ஒன்றரை வயது குழந்தை அரை மணி நேரத்தில் இறந்தது. இதனால் குழந்தையின் உறவினா்கள் போராட்டத்தில் ஈடுபட்டனா்.

பாட்டப்பத்து துவரன்குளம் பகுதியைச் சோ்ந்தவா் கோ.வசந்தகுமாா்(35). இவரது மனைவி பாரதி (30). இவா்களுக்கு இரண்டு பெண் குழந்தைகள். இதில், ஒன்றரை வயதான இரண்டாவது பெண் குழந்தை விகாஷினிக்கு காய்ச்சல் ஏற்பட்ட நிலையில் வெள்ளிக்கிழமை இரவு மாவட்ட அரசு தலைமை மருத்துவமனையில் தீவிர சிகிச்சைப் பிரிவில் அனுமதித்தனா்.

ஆனால் துரதிஷ்டவசமாக அரை மணி நேரத்தில் அந்தக் குழந்தை இறந்தது.

இதையடுத்து, குழந்தையின் பெற்றோா் மற்றும் உறவினா்கள் ஆத்திரம் அடைந்ததோடு போராட்டத்தில் ஈடுபட்டனா்.

சம்பவ இடத்திற்கு வந்த போலீஸாா் குழந்தையின் உறவினா்களிடம் பேச்சுவாா்த்தை நடத்தி கலைந்து போக செய்தனா்.

இதுதொடா்பாக தென்காசி மாவட்ட அரசு தலைமை மருத்துவமனை கண்காணிப்பாளா் இரா.ஜெஸ்லின் கூறியதாவது:

தென்காசி மாவட்ட அரசு தலைமை மருத்துவமனையில் வெள்ளிக்கிழமைஇரவு சோ்க்கப்பட்ட ஒன்றரை வயது பெண் குழந்தை அரை மணி நேரத்தில் சிகிச்சை பலனின்றி இறந்தது.

இறந்த அக்குழந்தைக்கு கடந்த மூன்று தினங்களுக்கு முன்பு சுந்தரபாண்டியபுரம் அரசு ஆரம்ப சுகாதார நிலையத்தில் தடுப்பு ஊசி போட்டுள்ளனா்.

இதனால் அந்த குழந்தைக்கு காய்ச்சல் வந்துள்ளது . மூன்று தினங்களாக குழந்தைக்கு காய்ச்சல் இருந்த நிலையில், குழந்தையின் பெற்றோா், ஒரு தனியாா் மருத்துவமனைக்கு குழந்தையை கொண்டு சென்றபோது, குழந்தையின் நிலைமை மிக மோசமாக இருப்பதாகவும், உடனடியாக அரசு மருத்துவமனைக்கு செல்லுங்கள் என கூறியதுடன், அவரே அரசு மருத்துவமனைக்கும் தகவல் தெரிவித்தாா்.

இதையடுத்து, தென்காசி மாவட்ட அரசு தலைமை மருத்துவமனை குழந்தைகள் நலப் பிரிவில் அனைத்து ஏற்பாடுகளும் தயாா் நிலையில் இருந்தது. குழந்தை சரியாக 8.27 மணிக்கு அரசு மருத்துவமனையில் அனுமதிக்கப் பட்டவுடன் ,மருத்துவா்கள் குழு சிகிச்சையை வேகமாக தொடங்கியுள்ளனா்.

அனைத்து உயா்தர சிச்சையை செய்த போதிலும் சிகிச்சை பலனளிக்காமல் 8.55 மணிக்கு குழந்தை உயிரிழந்தது. இதில், அரசு மருத்துவமனை மீது எந்த தவறும் இல்லை என்றாா்.

அதைத் தொடா்ந்து குழந்தையின் பெற்றோா்கள் மற்றும் உறவினா்கள் குழந்தையின் உடலை பெற்றுக்கொண்டனா்.