தென்காசி மாவட்டத்தில் 282 குளங்கள் நிரம்பின: அமைச்சா் கேகேஎஸ்எஸ்ஆா்.ராமச்சந்திரன்

தென்காசி மாவட்டத்தில் தொடா்ந்து பெய்து வரும் கனமழையால் 282குளங்கள் முழுமையாக நிரம்பியுள்ளதாக அமைச்சா் கேகேஎஸ்எஸ்ஆா்.ராமச்சந்திரன்

தென்காசி ஆட்சியா் அலுவலகத்தில் சனிக்கிழமை நடைபெற்ற ஆய்வுக் கூட்டத்தில் தெரிவித்தாா்.

இக் கூட்டத்துக்கு, தமிழக வருவாய் பேரிடா் மற்றும் மேலாண்மைதுறை அமைச்சா் கே.கே.எஸ்.எஸ்.ஆா்.ராமச்சந்திரன் தலைமை வகித்தாா். தொடா்ந்து செய்தியாளா்களிடம் கூறியதாவது:

கடந்த 13, 14ஆகிய 2 தினங்களில் தென்காசி மாவட்டத்தில் சராசரியாக 29.63செ.மீ மழை பெய்துள்ளது. இந்த மழையினால் உயிா்ச் சேதம் ஏதும் ஏற்படவில்லை. 3 நபா்கள் காயமடைந்து மருத்துவமனையில் சிகிச்சை பெற்றுவருகின்றனா்.

3ஆயிரத்து 800 கோழிகள், 2 மாடுகள், 1ஆடு இறந்துள்ளன. 51குடிசை வீடு பகுதி சேதமாகவும், 10 வீடுகள் முழுவதுமாக சேதமடைந்துள்ளன.

மாவட்டத்தில் உள்ள 958குளங்களில் 282 குளங்கள் 100சதமும், 205குளங்கள் 76சதம் முதல்99சதமும்,205 குளங்கள் 51சதம் முதல்75சதமும்,151 குளங்கள் 26சதம் முதல் 50சதமும், 115 குளங்கள் 1சதம் முதல்25சதம் வரை நீா் இருப்பு உள்ளன. 40நிவாரண முகாம்கள் தயாராக உள்ளன.

தொடா்மழை காரணமாக தாழ்வான பகுதிகளில் இருந்த பொதுமக்கள் அப்புறப்படுத்தப்பட்டு 204குடும்பங்களை சாா்ந்த 696 நபா்கள் 12 முகாம்களில் தங்க வைக்கப்பட்டுள்ளனா்.

இந்த மழையினால் மாவட்டத்தில் 2,248.4 ஹெக்டோ் நெல், 13,2758.5 ஹெக்டோ் சோளம், 15,659ஹெக்டோ் பருப்பு வகையிலான பயிா்கள் என மொத்தம் 31,187 ஹெக்டோ் பரப்பு வேளாண்மை பயிா்களும், 27.5ஹெக்டோ் தோட்டக்கலை பயிா்களும் நீரில் மூழ்கியுள்ளன.

விவசாய நிலங்களில் மழைநீா் தேங்கியுள்ள பரப்புகள் கள அலுவலா்களால் தொடா்ந்து கண்காணிக்கப்பட்டு வருகிறது. மாவட்டத்தில் மழையினால் சேதமடைந்த வாழைகள்குறித்து பட்டியலிடப்பட்டு வருகிறது என்றாா் அவா்.

மாவட்டஆட்சியா் ஏ.கே. கமல்கிஷோா், மாவட்ட கண்காணிப்பு அலுவலா் சங்கா், எம்எல்ஏக்கள் ஈ. ராஜா, சதன்திருமலைக்குமாா், தென்காசி தெற்கு மாவட்ட திமுக பொறுப்பாளா் வே.ஜெயபாலன், மாவட்ட வருவாய் அலுவலா் சீ.ஜெயசந்திரன், நகா்மன்றத் தலைவா்கள் சாதிா், ஹபிபுர்ரஹ்மான் ஆகியோா் கலந்துகொண்டனா்.