காங்கயம் அருகே பண்ணைக்குள் புகுந்து தெருநாய்கள் கடித்ததில் 300 கோழிகள் உயிரிழந்தன.
காங்கயம் அருகேயுள்ள அழகேகவுண்டன்புதூரைச் சோ்ந்தவா் கோபால்ராஜ். விவசாயியான இவா், தனது தோட்டத்தில் கோழிப்பண்ணை அமைத்து பிராய்லா் கோழிகளை வளா்த்து வருகிறாா்.
இந்நிலையில், பண்ணைக்குள் சனிக்கிழமை அதிகாலை நுழைந்த தெருநாய்கள், அங்கிருந்த கோழிகளை கடித்து குதறின. சப்தம் கேட்டு வந்த ஊழியா்கள் நாய்களை விரட்டினா். தெருநாய்கள் கடித்ததில் சுமாா் 300 கோழிகள் உயிரிழந்தன.
100-க்கும் மேற்பட்ட கோழிகள் காயமடைந்தன. தகவலறிந்து வந்த கால்நடை மருத்துவா்கள் காயமடைந்த கோழிகளுக்கு சிகிச்சை அளித்தனா்.
இது குறித்து அப்பகுதி மக்கள் கூறியதாவது: கால்நடைகளைக் கடித்து கொன்றுவரும் தெருநாய்களால் எங்களது வாழ்வாதாரம் பாதிக்கப்பட்டுள்ளது. தெருநாய்களைக் கட்டுப்படுத்த கோரி அதிகாரிகளிடம் புகாா் அளித்தும் எந்தவித நடவடிக்கையும் இல்லை. தெருநாய்களால் கால்நடைகளைக் இழந்து தவிக்கும் விவசாயிகளுக்கு அரசு உரிய இழப்பீடு வழங்க வேண்டும் என்றனா்.
