தேரிகுடியிருப்பு கோயிலில் ஏழுநிலை ராஜகோபுரத்துக்கு அடிக்கல் நாட்டு விழா

திருச்செந்தூா் அருகே தேரிகுடியிருப்பு அருள்மிகு கற்குவேல் அய்யனாா் திருக்கோயிலில் ஏழு நிலை ராஜகோபுரம் கட்டுவதற்கான அடிக்கல் நாட்டு விழா புதன்கிழமை நடைபெற்றது.

இந்து சமய அறநிலையத் துறைக்குப் பாத்தியப்பட்ட இக் கோயிலில் பூரணம், பொற்கலை தேவியருடன் அய்யன் அமா்ந்த நிலையில் அருள்பாலித்து வருகிறாா்.

இக் கோயிலில், சென்னையைச் சோ்ந்த எஸ்.பாலசுப்பிரமணியம், எஸ்.அருண் ஆகியோா் ரூ.12 கோடியில் ராஜகோபுரம் கட்டுவதற்கு உபயதாரா்களாகச் சோ்க்கப்பட்டுள்ளனா்.

இதனையடுத்து ராஜகோபுரம் கட்டுவதற்கான அடிக்கல் நாட்டு விழா புதன்கிழமை நடைபெற்றது. இவ்விழாவை இந்து சமய அறநிலையத் துறை இணை ஆணையா் ம.அன்புமணி தொடங்கி வைத்தாா். தொடா்ந்து பல்வேறு யாகசாலை பூஜைகள், மகா கணபதி, நவக்கிரக ஹோமங்கள், தீபாராதனை, பிரசாதம் வழங்கல் நடைபெற்றது.

இந்நிகழ்வுகளில் திருக்கோயில் செயல் அலுவலா் ந.காந்திமதி, ஆய்வாளா் முத்துமாரியம்மாள், திருச்செந்தூா் நகா்மன்றத் தலைவா் ஏ.பி.ரமேஷ், உடன்குடி ஊராட்சி ஒன்றியக் குழு முன்னாள் தலைவா் டி.பி.பாலசிங்,உடன்குடி கிழக்கு ஒன்றிய திமுக செயலா் க.இளங்கோ, கோயில் அறங்காவலா் குழு தலைவா் ச.பாலசுப்பிரமணியன், அறநிலையத்துறை பொறியாளா்கள் சுந்தா், அஸ்வினி, மணிகண்டன், மண்டல ஸ்தபதி பாா்த்திபன், திமுக மாவட்டப் பிரதிநிதி மதன்ராஜ், உடன்குடி பேரூராட்சி உறுப்பினா் ஜான்பாஸ்கா், திமுக மின் தொழிலாளா் சங்க கோட்ட அமைப்பாளா் பத்மநாபன், உடன்குடி ஒன்றிய திமுக இளைஞரணி அமைப்பாளா் மனோஜ் உள்பட திரளான பக்தா்கள் பங்கேற்றனா்.