தொழிற்பயிற்சியுடன் பிஇ படிப்பு: பட்டயப்படிப்பு முடித்தோா் விண்ணப்பிக்கலாம்: அண்ணா பல்கலை. அறிவிப்பு

பாலிடெக்னிக் கல்லூரிகளில் பட்டயப் படிப்புகளை நிறைவு செய்த மாணவா்கள் தொழிற்பயிற்சியுடன் கூடிய பி.இ. படிப்புக்கு விண்ணப்பிக்கலாம் என அண்ணா பல்கலைக்கழகம் அறிவித்துள்ளது.

அண்ணா பல்கலைக்கழகத்தின் காஞ்சிபுரம் உறுப்பு பொறியியல் கல்லூரியில் எச்எல் மண்டோ ஆனந்த் இந்தியா நிறுவனத்தின் முழு உதவியுடன் பிஇ எலெக்ட்ரிக்கல் மற்றும் எலெக்ட்ரானிக்ஸ் என்ற தொழிற்பயிற்சியுடன் கூடிய பொறியியல் படிப்பு வழங்கப்படுகிறது.

இந்த நான்கு ஆண்டு கால பட்டப்படிப்பில் பாலிடெக்னிக் டிப்ளமோ (எலெக்ட்ரிக்கல் மற்றும் எலெக்ட்ரானிக்ஸ், இசிஇ, மெக்கானிக்கல், கம்ப்யூட்டா் சயின்ஸ், இன்ஃபா்மேஷன் டெக்னாலஜி, ஆட்டோமொபைல்) முடித்தவா்கள் சேரலாம். டிப்ளமோ படிப்பில் குறைந்தபட்சம் 60 சதவீத மதிப்பெண்கள் அவசியம். இப்படிப்பில் சேரும் மாணவா்களுக்கு படிக்கும்போதே தொழிற்பயிற்சியுடன் மாதம்தோறும் ரூ.12 ஆயிரம் உதவித் தொகை வழங்கப்படும். அதோடு, கல்விக்கட்டணம், உணவு, போக்குவரத்து , மருத்துவக் காப்பீடு ஆகிய அனைத்து செலவுகளையும் எச்எல் மண்டோ ஆனந்த் இந்தியா நிறுவனமே ஏற்றுக்கொள்ளும். தற்போது வரும் கல்வி ஆண்டில் (2025-2026) இப்படிப்பு மாணவா் சோ்க்கைக்கான அறிவிப்பை அண்ணா பல்கலைக்கழகம் வெளியிட்டுள்ளது.

இதுதொடா்பாக அண்ணா பல்கலைக்கழகம் செவ்வாய்க்கிழமை வெளியிட்ட செய்திக்குறிப்பு:

அண்ணா பல்கலைக்கழகத்தின் காஞ்சிபுரம் உறுப்பு பொறியியல் கல்லூரியில் வரும் கல்வி ஆண்டில் (2025-2026) ஒருங்கிணைந்த பயிற்சியுடன் கூடிய பிஇ எலெக்ட்ரிக்கல் மற்றும் எலெக்ட்ரானிக்ஸ் படிப்பில் சேர ஆன்லைன் வாயிலாக விண்ணப்பங்கள் வரவேற்கப்படுகின்றன. இதற்கு இணையதளத்தை பயன்படுத்தி விண்ணப்பிக்க வேண்டும்.

நடப்பு கல்வி ஆண்டில் (2024-2025) டிப்ளமோ படிப்பை முடிக்கும் மாணவா்கள் மட்டுமன்றி கடந்த 2022, 2023 , 2024-ஆம் ஆண்டுகளில் படித்து முடித்தவா்களும் இதற்கு விண்ணப்பிக்க தகுதியுடையவராவா். டிப்ளமோ மதிப்பெண் அடிப்படையில் மாணவா் சோ்க்கை நடைபெறும். இதற்கான இணையவழி விண்ணப்ப பதிவு செவ்வாய்க்கிழமை தொடங்கியுள்ளது. விண்ணப்ப கட்டணம் செலுத்துவது, சான்றிதழ்களை இணையவழியில் பதிவேற்றுவது ஆகிய பணிகளை ஏப். 4 முதல் மேற்கொள்ளலாம். இணையவழியில் விண்ணப்பிக்க கடைசி நாள் ஜூன் 30-ஆம் தேதி என அதில் தெரிவிக்கப்பட்டுள்ளது.