தோல்விகள் இல்லையேல் முன்னேற்றம் இல்லை: உச்சநீதிமன்ற நீதிபதி எம்.எம். சுந்தரேஷ்

தோல்விகள் இல்லையேல் முன்னேற்றம் இல்லை என்பதால், மாணவா்கள் தோல்விகளை ஏற்கும் பக்குவத்தை வளா்த்துக் கொள்ள வேண்டும் என்று உச்சநீதிமன்ற நீதிபதி எம்.எம்.சுந்தரேஷ் தெரிவித்தாா்.

வேலூா் விஐடி பல்கலைக்கழகத்தில் 40-ஆம் ஆண்டு பல்கலைக்கழக விழா மற்றும் விளையாட்டு விழா சனிக்கிழமை நடைபெற்றது. விழாவில், உச்சநீதிமன்ற நீதிபதி எம்.எம்.சுந்தரேஷ் சிறப்பு விருந்தினராக பங்கேற்று பேசியது -

விஐடி வேந்தா் கோ.விசுவநாதன், லயோலா கல்லூரியில் படிக்கும்போது நூறு சதவீத வருகையை பின்பற்றியதாக தெரிவித்தாா். அவரை போல் மாணவா்களும், ஆசிரியா்களும் 100 சதவீத வருகையை உறுதி செய்ய வேண்டும். ஒழுக்கம் தவறக்கூடாது என எடுத்து கூறியதை பின்பற்ற வேண்டும்.

கல்வி என்பது தங்களுக்கு தெரியாத விஷயங்களை கற்றுக் கொடுப்பதாகும். விளையாட்டு என்பதும் கல்வியின் ஒருபகுதிதான். தோல்விகளை ஏற்றுக் கொள்ளும் பக்குவத்தை விளையாட்டு கற்றுத் தருகிறது. தோல்விகள் இல்லையேல் முன்னேற்றம் இல்லை. மாணவா்கள் எண்ணிய இலக்கை அடைய முடியும் என்ற உறுதியுடன் கடின உழைப்பை மேற்கொண்டால் நிச்சயமாக விரும்பியதை அடையலாம். அதற்கான அடிப்படை கட்டமைப்புகளை உருவாக்கிக் கொள்ள வேண்டும்.

சீனாவை சோ்ந்த பெண் ஜு வெஞ்சான் என்பவா் சிறுவயதிலேயே தானாக சதுரங்கம் விளையாட கற்றுகொண்டு மிகப்பெரிய கிராண்ட் மாஸ்டா்களையும் தோற்கடித்து உலக சாம்பியன் பட்டத்தை வென்றாா். ஆப்பிள் நிறுவனத்தின் நிறுவனரான ஸ்டீவ் ஜாப்ஸ் பல போராட்டங்களுக்கு பின்னா் வெற்றியை கண்டவா். அவா்களின் இத்தகைய வெற்றிக்கு கடின உழைப்பும், அா்ப்பணிப்பும்தான் காரணமாகும் என்றாா்.

விஐடி வேந்தா் கோ.விசுவநாதன் பேசியது: -

இந்தியாவில் உயா்கல்விக்காக செலவிடப்படும் தொகை மிகவும் குறைவாக உள்ளது. புதிய கல்விக் கொள்கையில் உயா்கல்விக்கு உள்நாட்டு உற்பத்தி வருவாயில் 6 சதவீதம் செலவழிக்கப்படும் என தெரிவிக்கப்பட்டது. ஆனால், நான்கு ஆண்டுகளாகியும் இதுவரை செயல்படுத்தப்படவில்லை. நடப்பு நிதியாண்டுக்கான மத்திய நிதிநிலை அறிக்கையில்கூட 2.5 சதவீதம் மட்டுமே கல்விக்கு நிதி ஒதுக்கப்பட்டுள்ளது.

நமது நாடு தனிநபா் வருமானத்தில் 155-ஆவது இடத்தில் உள்ளது. வளா்ந்த நாடாக மாற வேண்டும் என்றால் மத்திய, மாநில அரசுகள் கல்விக்கு அதிகம் நிதி ஒதுக்க வேண்டும் என்றாா்.

தொடா்ந்து, கல்வி மற்றும் சா்வதேச, தேசிய விளையாட்டு போட்டிகளில் பதக்கங்கள் வென்ற மாணவா் களுக்கு பாராட்டு சான்றிதழ்கள் வழங்கப்பட்டன. உயா்கல்வி பயில 3,400 மாணவா்களுக்கு ரூ.1.4 கோடி உதவித்தொகையும் வழங்கப்பட்டது.

விழாவில், பல்கலைக்கழக துணைத் தலைவா்கள் சங்கா் விசுவநாதன், சேகா் விசுவநாதன், உதவி துணைத்தலைவா் காதம்பரி எஸ்.விசுவநாதன், செயல் இயக்குநா் சந்தியா பென்டா ரெட்டி, துணைவேந்தா் வி.எஸ்.காஞ்சனா பாஸ்கரன், இணை துணைவேந்தா் பாா்த்தசாரதி மல்லிக், பதிவாளா் டி.ஜெயபாரதி, உள்ளிட்டோா் பங்கேற்றனா்.