நாட்டின் சிறந்த மாற்றத்துக்கு உதவிய அரசமைப்புச் சட்டம்: தலைமை நீதிபதி சஞ்சீவ் கன்னா

‘இந்தியா இன்றைக்கு துடிப்பான ஜனநாயக நாடாகவும், புவிசாா் அரசியல் தலைவராகவும் உருவெடுத்துள்ளது. இந்த மாற்றத்துக்கு அரசமைப்புச் சட்டமே உதவியது’ என்று உச்சநீதிமன்ற தலைமை நீதிபதி சஞ்சீவ் கன்னா தெரிவித்தாா்.

உச்சநீதிமன்ற வழக்குரைஞா் சங்கம் சாா்பில் ஏற்பாடு உச்சநீதிமன்ற வளாகத்தில் நடைபெற்ற அரசமைப்புச் சட்ட தின நிகழ்ச்சியில் செவ்வாய்க்கிழமை சஞ்சீவ் கன்னா பங்கேற்று பேசியதாவது:

கல்வி அறிவின்மை, வறுமை, வலுவான ஜனநாயக அமைப்பு இல்லாதது உள்ளிட்ட பாதிப்புகளில் சிக்கியிருந்த இந்தியா, அவற்றிலிருந்து விடுபட்டு இன்றைக்கு தன்னம்பிக்கை கொண்ட நாடாகவும், துடிப்பான ஜனநாயகமாகவும், புவிசாா் அரசியல் தலைவராகவும் உருவெடுத்துள்ளது. தேசத்தின் இந்த மிகப்பெரிய மாற்றத்துக்கு அரசமைப்புச் சட்டமே உதவியுள்ளது. அதுபோல, நீதித் துறைக்கும் அரசமைப்புச் சட்டம் தனித்துவமான நிலையை வழங்கியுள்ளது என்றாா்.

மேலும், நீதித்துறையில் வழங்குரைஞா் சங்கத்தின் முக்கியத்துவம் மற்றும் பங்களிப்பை சுட்டிக்காட்டிய தலைமை நீதிபதி, ‘நீதித் துறையை பெரும்பாலும் அங்கி அணிந்த நபா்கள் எனக் குறிப்பிடுகிறோம். நீதிபதிகளே அவ்வாறு குறிப்பிடப்படுகின்றனா். ஆனால், நீதித்துறையில் வழக்குரைஞா் சங்கமும் சம அளவிலான பங்களிப்பை அளித்து வருகிறது. நீதித் துறையில், நீதிபதிகளுக்கு இணையான பங்களிப்பை வழக்குரைஞா்களும் செய்து வருகின்றனா். நான் நீதிபதியாக இருந்த காலத்தைவிட, வழக்குரைஞராக பணிபுரிந்த காலமே அதிகம். நீதிபதிகள் வழக்குரைஞா் சங்கத்திலிருந்தே வருகின்றனா்; பின்னா் மீண்டும் அந்த சங்கத்துக்கே செல்கின்றனா். அந்த வகையில் நாம் அனைவரும் வழக்குரைஞா் சங்கத்தைச் சாா்ந்தவா்களே. சிறந்த வழக்குரைஞா்களாக இருப்பவா்களே, சிறந்த நீதிபதிகளாகவும் உருவெடுக்கின்றனா்.

சுற்றுச்சூழல் சட்டம், தனியுரிமை சட்டங்கள், அடிப்படை உரிமைகள் முதல் அடிப்படை கட்டமைப்பு கோட்பாடுகள் வரையிலான விவகாரங்களில் சிறந்த முடிவுகளை வழங்கிய வலுவான பாரம்பரியத்தை உச்சநீதிமன்றம் கொண்டுள்ளது. வழக்குரைஞா்களின் பங்களிப்புகளின்றி இது சாத்தியமில்லை’ என்றாா்.