நார்வே செஸ்:அர்ஜுன், வைஷாலி வெற்றி!

ஸ்டாவெஞ்சர்: நார்வே செஸ் போட்டியின் 5-ஆவது சுற்றில் இந்தியாவின் அர்ஜுன் எரிகைசி வெற்றி பெற, நடப்பு உலக சாம்பியனான டி.குகேஷ் தோல்வி கண்டார்.

முன்னதாக இந்தச் சுற்றில், அர்ஜுன் - அமெரிக்காவின் ஹிகாரு நகமுரா, குகேஷ் - சீனாவின் வெய் யி, அமெரிக்காவின் ஃபாபியானோ கரானா - போட்டியில் நடப்பு சாம்பியனான நார்வேயின் மேக்னஸ் கார்ல்சென் ஆகியோர் மோதிக் கொண்ட கிளாசிக்கல் ஆட்டம் டிராவில் முடிந்தது.

இதையடுத்து, அவர்களில் வெற்றியாளரை தீர்மானிக்க நடத்தப்பட்ட ஆர்மகெடான் ஆட்டத்தில், அர்ஜுன் - நகமுராவை வெல்ல, குகேஷ் - வெய் யியிடம் தோற்றார். கார்ல்சென் - கரானாவை வீழ்த்தினார். 5 சுற்றுகள் முடிவில் கார்ல்சென் (9.5), கரானா (8), நகமுரா (6.5) ஆகியோர் முறையே முதல் 3 இடங்களில் இருக்க, அர்ஜுன் (6), வெய் யி (5.5), குகேஷ் (5.5) ஆகியோர் கடைசி 3 இடங்களைப் பிடித்துள்ளனர்.

முதலிடத்தில் கோனெரு ஹம்பி: இப்போட்டியின் மகளிர் பிரிவு 5-ஆவது சுற்றில், இந்தியாவின் ஆர்.வைஷாலி - ஸ்பெயினின் சாரா காதெமை வீழ்த்தினார்.

இந்தியாவின் கோனெரு ஹம்பி - சீனாவின் லெய் டிங்ஜி, சீனாவின் ஜு வென்ஜுன் - உக்ரைனின் அனா முஸிஷுக் மோதல் டிராவில் முடிந்தது.

டிரா செய்தோருக்கான ஆர்மகெடான் ஆட்டத்தில் கோனெரு ஹம்பி - டிங்ஜியை வெல்ல, வென்ஜுன் - முஸிஷுக் ஆட்டம் இந்த முறையும் டிராவில் முடிந்தது. இதையடுத்து, 5 சுற்றுகள் முடிவில் கோனெரு ஹம்பி (8.5), முஸிஷுக் (8), வென்ஜுன் ஆகியோர் முதல் 3 இடங்களிலும், வைஷாலி (6.5), டிங்ஜி (5), சாரா (5) ஆகியோர் கடைசி 3 இடங்களிலும் உள்ளனர்.