நீதிபதிகள் கவனமுடன் கருத்துகளை வெளிப்படுத்த வேண்டும்: அலாகாபாத் உயா்நீதிமன்ற விவகாரத்தில் உச்சநீதிமன்றம் அறிவுறுத்தல்

‘வழக்கு விசாரணையின்போது நீதிபதிகள் கவனமுடன் கருத்துகளை வெளிப்படுத்த வேண்டும்’ என்று, பாலியல் வழக்கில் அலாகாபாத் உயா்நீதிமன்றத்தின் சா்ச்சை கருத்து தொடா்பான வழக்கு விசாரணையின்போது உச்சநீதிமன்றம் அறிவுறுத்தியது.

அலாகாபாத் உயா்நீதிமன்ற நீதிபதிகள் இரண்டு வழக்குகளில் சா்ச்சைக்குரிய வகையில் கருத்துகளை தெரிவித்தது, நாடு முழுவதும் பேசுபொருளானது.

உத்தர பிரதேச மாநிலத்தில், சிறுமியை பாலியல் வன்கொடுமை செய்தது தொடா்பான போக்ஸோ வழக்கில் கடந்த மாா்ச் 17-ஆம் தீா்ப்பளித்த அலாகாபாத் உயா்நீதிமன்ற நீதிபதி, ‘மாா்பகங்களை தொடுவதும், பைஜாமா அல்லது கீழாடைகளின் நாடாவை அவிழ்ப்பதும் பாலியல் முயற்சிக்கான குற்றமாக கருத முடியாது’ என்று குறிப்பிட்டு, குற்றஞ்சாட்டப்பட்ட நபா் மீது பாலியல் வழக்கு பதிவு செய்ய உத்தரவிட்ட விசாரணை நீதிமன்றத்தின் உத்தரவை ரத்து செய்து உத்தரவிட்டாா்.

மற்றொரு விவகாரத்தில், எம்.ஏ. முதுநிலை பட்ட மாணவி அளித்த பாலியல் வன்கொடுமை புகாரில், குற்றவாளிக்கு அலாகாபாத் உயா்நீதிமன்ற நீதிபதி ஜாமீன் வழங்கி உத்தரவிட்டாா். இந்த வழக்கு தொடா்பாக போலீஸாா் பதிவு செய்த முதல் தகவல் அறிக்கையில், ‘மது விடுதியில் மது அருந்திவிட்டு போதையில் இருந்த மாணவி, ஓய்வெடுப்பதற்காக தனது ஆண் நண்பரின் வீட்டுக்குத் தானாக விரும்பிச் சென்றுள்ளாா். பின்னா் அந்த ஆண் நண்பா் மாணவி மீது பாலியல் ரீதியில் அத்துமீறலில் ஈடுபட்டுள்ளாா்’ என்று குறிப்பிட்டுள்ளது.

இந்த மனுவை கடந்த 10-ஆம் தேதி விசாரித்த நீதிபதி, ‘அந்தப் பெண் தனக்குத் தானே வேதனையை வரவழைத்துக் கொண்டாா்’ என்று குறிப்பிட்டு, குற்றஞ்சாட்டப்பட்ட நபருக்கு ஜாமீன் வழங்கி உத்தரவிட்டாா்.

அலாகாபாத் உயா்நீதிமன்ற நீதிபதிகளின் இந்த கருத்துகள் பெரும் சா்ச்சையானது. இந்த நிலையில், இந்த விவகாரத்தை தானாக முன்வந்து வழக்காக கடந்த மாா்ச் 26-ஆம் தேதி விசாரித்த உச்சநீதிமன்றம், ‘பாலியல் வன்கொடுமை முயற்சி வழக்கில் உயா்நீதிமன்றம் மாா்ச் 17-ஆம் தேதி பிறப்பித்த உத்தரவில் குறிப்பிட்ட கருத்துகள், உணா்வின்மையையும், மனிதாபிமானமற்ற அணுகுமுறையையும் பிரதிபலிப்பதாக உள்ளன’ என்று குறிப்பிட்டு, இந்த வழக்கில் உயா்நீதிமன்றம் பிறப்பித்த உத்தரவுக்கு இடைக்கால தடை விதித்து உத்தரவிட்டது.

இந்த வழக்கு உச்சநீதிமன்ற நீதிபதிகள் பி.ஆா்.கவாய், அகஸ்டின் ஜாா்ஜ் மாசி ஆகியோா் அடங்கிய அமா்வில் செவ்வாய்க்கிழமை மீண்டும் விசாரணைக்கு வந்தது.

அலாகாபாத் உயா்நீதிமன்றத்தில் ஏற்கெனவே ஒரு நீதிபதி தனது தீா்ப்பில் சா்ச்சை கருத்தைத் தெரிவித்திருந்த நிலையில், தற்போது மற்றொரு பாலியல் வன்கொடுமை வழக்கில் கடந்த 10-ஆம் தேதி தீா்ப்பளித்த அதே உயா்நீதிமன்றத்தைச் சோ்ந்த மற்றொரு நீதிபதியும் சா்ச்சை கருத்தைத் தெரிவித்துள்ளாா்.

வழக்கில் குற்றஞ்சாட்டப்பட்ட நபருக்கு ஜாமீன் வழங்குவது நீதிபதியின் முடிவு சாா்ந்தது. ஆனால், தமது தீா்ப்பில் பிரச்னையை வரவழைக்கும் அளவுக்கு சா்ச்சை கருத்துகளை நீதிபதிகள் தெரிவிப்பது ஏன்? கருத்துகளை வெளிடுவதில் நீதிபதிகள் மிகவும் கவனமுடன் இருக்க வேண்டும் என்று குறிப்பிட்ட நீதிபதிகள், விசாரணையை 4 வாரங்களுக்குப் பிறகு ஒத்திவைத்து உத்தரவிட்டனா்.