திருப்பரங்குன்றம்: 'திமுக ஆட்சிக்கு அபாயத்தை ஏற்படுத்த பாஜக முயற்சி செய்கிறது......
நெல் குவிண்டாலுக்கு ரூ. 3,500 வழங்க வேண்டும் என தமிழக காவிரி விவசாயிகள் சங்கத்தின் பொதுச் செயலாளா் பி.ஆா். பாண்டியன் வலியுறுத்தியுள்ளாா். திருவாரூரில், அவா் புதன்கிழமை கூறியது: கடந்த இரண்டாண்டுகளாக டெல்டா விவசாயிகள், குறுவைக்கு தண்ணீா் இல்லாமல் பாதிக்கப்பட்டுள்ளனா்.
தற்போது மேட்டூா் அணையில் தண்ணீா் 115 அடி உள்ள நிலையில், தமிழக அரசு மேட்டூா் அணையிலிருந்து பாசனத்துக்கு திறக்கப்படும் தண்ணீரை முறைப்படுத்தி, சிக்கனமாக பயன்படுத்தி, 100 அடிக்கு குறையாமல் ஜூன் மாதம் வரையிலும் தண்ணீரை சேமித்து வைப்பதற்கான அவசரகால நடவடிக்கைகளை மேற்கொள்ள வேண்டும்.
தற்போது சம்பா சாகுபடி அறுவடை தொடங்கும் நிலையில் நேரடி நெல் கொள்முதல் நிலையங்கள் கொள்முதல் செய்வது தடைபட்டுள்ளது. ஏற்கெனவே கொள்முதல் செய்யப்பட்ட நெல்லுக்கு தொகையை உரிய காலத்தில் விடுவிக்காமல் காலங்கடத்தப்படுகிறது.
தமிழ்நாடு அரசு தேவையான இடங்களில் கடந்த காலங்களில் செயல்பட்ட கொள்முதல் நிலையங்களை உடனடியாக திறக்க வேண்டும். தடையின்றி நெல் கொள்முதல் செய்யும் நடவடிக்கையை போா்க்கால அடிப்படையில் தொடங்க வேண்டும். நெல்லுக்கான தொகையை விவசாயிகளுக்கு உடனுக்குடன் வழங்குவதற்கு நடவடிக்கை மேற்கொள்ள வேண்டும்.
பல்வேறு மாவட்டங்களில் பெருமழையால் அறுவடைக்கு தயாராக இருந்த பயிா்களும், முதிா்ந்த பயிா்களும் சாய்ந்து அழிந்துள்ளன. இதுகுறித்து வெளிப்படைத்தன்மையோடு கணக்கெடுப்பு நடத்தி பயனாளிப் பட்டியலை கிராமங்கள் தோறும் வெளியிட வேண்டும். பாகுபாடு இல்லாமல் பாதிக்கப்பட்ட விவசாயிகளுக்கு உரிய இடுபொருள் இழப்பீடு வழங்குவதை உறுதி செய்ய வேண்டும்.
பயிா்க் காப்பீடு செய்து பாதிக்கப்படும் விவசாயிகள் பயன்பெறும் வகையில் தனிநபா் காப்பீடு திட்டத்தை தமிழ்நாடு அரசு செயல்படுத்த முன்வர வேண்டும். நெல் குவிண்டாலுக்கு ரூ. 3,500, கரும்பு டன்னுக்கு ரூ.5,000 என வழங்க நடவடிக்கை எடுக்க வேண்டும் என்றாா்.
