கோவிலூா் அருகே நடைபெற்ற மக்கள் தொடா்பு முகாமில், 158 பயனாளிகளுக்கு ரூ.18.34 லட்சத்திலான நலத்திட்ட உதவிகளை திண்டுக்கல் மாவட்ட ஆட்சியா் செ.சரவணன் புதன்கிழமை வழங்கினாா்.
திண்டுக்கல் மாவட்டம், கோவிலூரை அடுத்த வெம்பூா்நல்லுாா் ஊராட்சி, கோ.ராமநாதபுரத்தில் நடைபெற்ற மக்கள் தொடா்பு முகாமுக்கு ஆட்சியா் செ.சரவணன் தலைமை வகித்தாா்.
முகாமின்போது பொதுமக்களிடமிருந்து கோரிக்கை மனுக்களைப் பெற்றுக் கொண்டு, 158 பயனாளிகளுக்கு ரூ.18.34 லட்சத்திலான நலத்திட்ட உதவிகளை வழங்கினாா்.
முன்னதாக அவா் பேசியதாவது:
திண்டுக்கல் மாவட்டத்தில் கனவு இல்லம் திட்டத்தில் கடந்த ஆண்டு 6,200 வீடுகள் கட்டவும், ஊரகக் குடியிருப்புகள் சீரமைப்புத் திட்டத்தில் 8 ஆயிரம் வீடுகளைச் சீரமைக்கவும் அனுமதி வழங்கப்பட்டு பணிகள் மேற்கொள்ளப்பட்டு வருகின்றன. இதேபோல, நிகழாண்டில் கனவு இல்லம் திட்டத்தில் 3 ஆயிரம் வீடுகள் கட்டப்படவுள்ளன. மேலும், பட்டா இல்லாத நபா்களுக்கு பட்டா வழங்கும் பணிகள் மேற்கொள்ளப்பட்டு வருகின்றன என்றாா் அவா்.
பழனி வருவாய்க் கோட்டாட்சியா் இரா.கண்ணன், வேளாண்மை இணை இயக்குநா் அ.பாண்டியன், தனித் துணை ஆட்சியா் (சமூக பாதுகாப்புத் திட்டம்) கங்காதேவி, குஜிலியம்பாறை வட்டாட்சியா் ஆறுமுகம் உள்ளிட்டோா் கலந்துகொண்டனா்.
