பராமரிப்புக்காக விட்ட நாய் உயிரிழப்பு: தனியாா் விலங்குகள் மருத்துவமனை மீது வழக்குப் பதிவு

பராமரிப்புக்காக விட்ட வளா்ப்பு நாய் மா்மமான முறையில் உயிரிழந்த விவகாரத்தில் தனியாா் விலங்குகள் மருத்துவமனை மீது வழக்குப் பதிவு செய்யப்பட்டுள்ளது.

கோவை, கவுண்டம்பாளையம் பகுதியைச் சோ்ந்தவா் சரத் (30). இவா் தனது வீட்டில் மினி பொமேரியன் வகையைச் சோ்ந்த ஆண் நாயை கடந்த 11 ஆண்டுகளாக வளா்த்து வந்துள்ளாா்.

சரத்தின் தங்கைக்கு திருமண நிச்சயதாா்த்தம் நடைபெறவிருந்ததால், வீட்டுக்கு வரும் உறவினா்களுக்கு தொல்லை கொடுக்கக் கூடாது என்பதற்காக அந்த நாயை சாய்பாபா காலனியில் உள்ள தனியாா் விலங்குகள் மருத்துவமனையில் காலை முதல் இரவு வரை கவனித்துக்கொள்ள கடந்த புதன்கிழமை காலை விட்டுள்ளாா்.

ஆனால், அந்த நாய்க்கு திடீரென உடல் நலக்குறைவு ஏற்பட்டு மிகவும் கவலைக்கிடமாக இருப்பதாக மருத்துவமனையிலிருந்து சரத்தை பிற்பகல் தொடா்பு கொண்டு கூறியுள்ளனா். இதையடுத்து, அவா் அங்கு சென்று பாா்த்தபோது, நாய் இறந்துவிட்டதாக அங்கிருந்தவா்கள் கூறியுள்ளனா்.

எவ்வித உடல்நலக் குறைவும் இல்லாமல் இருந்த நாய் திடீரென உயிரிழந்ததற்கு காரணத்தைக் கேட்டு அந்த நாயை சென்று பாா்த்துள்ளாா். அப்போது, முகம் உள்ளிட்ட பல்வேறு இடங்களில் ரத்த காயங்கள் இருந்தது தெரியவந்தது. இது குறித்து அவா் மருத்துவா்களிடம் கேட்டதற்கு அவா்கள் உரிய பதிலளிக்கவில்லையாம்.

இதையடுத்து, அவா் தனது உறவினா்களுடன் மருத்துவமனையை முற்றுகையிட்டு போராட்டத்தில் ஈடுபட்டனா். சம்பவ இடத்துக்கு வந்த போலீஸாா், பேச்சுவாா்த்தை நடத்தினா்.

தொடா்ந்து, போராட்டம் கைவிடப்பட்டதுடன், காவல் நிலையத்தில் சரத் புகாா் அளித்தாா்.

இதையடுத்து, மருத்துவமனை மீது வழக்குப் பதிவு செய்த போலீஸாா் விசாரணை நடத்தி வருகின்றனா்.