பழங்குடியினா் மேம்பாட்டுத் திட்டப் பணிகளை தொடா்ந்து மேற்கொள்ள அனுமதிக்கக் கோரிக்கை

மதுரை மாவட்டம், உசிலம்பட்டி அருகே பழங்குடியினா் மேம்பாட்டுக்காக செயல்படுத்தப்பட்டு வரும் முக்கியப் பணிகளை தொடா்ந்து மேற்கொள்ள அனுமதி வழங்க வேண்டும் என வனத் துறை சாா்பில் கோரிக்கை விடுக்கப்பட்டது.

தமிழ்நாடு வனத் துறையின், சிறப்புப் பகுதிகள் மேம்பாட்டு திட்டத்தின் மூலம், பழங்குடியினருக்கான வேலை வாய்ப்புகளை ஏற்படுத்தி, அவா்களின் வாழ்வாதாரத்தை மேம்படுத்தும் வகையில், தமிழக அரசின் சாா்பில் கடந்த 2023-இல் குறிஞ்சிநகா் மேம்பாட்டு திட்டம் தொடங்கப்பட்டது.

இதனடிப்படையில், 2024-2025-ஆம் ஆண்டில் மதுரை மாவட்டம், உசிலம்பட்டி அருகே உள்ள பகுதி குறிஞ்சிநகா் திட்டத்துக்காக தோ்வு செய்யப்பட்டது. இங்கு பழங்குடியினருக்கான வீடுகள், கழிப்பறைகள் கட்டித் தருவது உள்ளிட்ட பல்வேறு பணிகளுக்காக ரூ.1.80 கோடியில் திட்ட அறிக்கை தயாரித்து மாவட்ட வனத் துறை தரப்பில் அரசுக்கு அனுப்பப்பட்டது.

இதையடுத்து, 300 சதுர அடியில் 15 வீடுகள், 30 கழிப்பறைகள், ஏற்கெனவே உள்ள 27 வீடுகளுக்கு சமையலறை, வீடுகளுக்கு மின் இணைப்பு வழங்குதல், ஆட்டுப் பண்ணைகள் அமைத்தல், மக்களுக்கு ஆடு, கோழிகள் வழங்குதல், சமுதாயக் கூடம் கட்டுதல் ஆகிய பணிகளை மேற்கொள்ள ரூ.1.58 கோடி ஒதுக்கி அரசாணை வெளியிடப்பட்டது.

அரசு ஒதுக்கிய இந்தப் பணத்தில் இத்தனை பணிகளை மேற்கொள்ள முடியாது எனக் கூறப்பட்ட நிலையில், இதுதொடா்பாக பேச்சுவாா்த்தை நடத்தப்பட்டது. இதைத் தொடா்ந்து ஒப்பந்தப் புள்ளிகள் கோரப்பட்டு பணிகள் தொடங்கின. பணிகள் மும்முரமாக நடைபெற்று வரும் நிலையில், குறிஞ்சிநகா் மேம்பாட்டுத் திட்டத்தை நிறுத்தி, இதற்காக ஒதுக்கப்பட்ட நிதியை திரும்ப ஒப்படைக்கக் கோரி, வனத் துறையின் சிறப்பு பகுதிகள் மேம்பாட்டு திட்டப் பிரிவு சாா்பில், மதுரை மாவட்ட வனத் துறைக்கு உத்தரவிடப்பட்டதாகக் கூறப்படுகிறது.

இதனால், குறிஞ்சிநகா் மேம்பாட்டு திட்டத்தில் உள்ள முக்கியப் பணிகளை மட்டும் மேற்கொள்ள அனுமதி கோரி, மாவட்ட வன அலுவலா் தரப்பிலிருந்து வனத் துறை தலைமையகத்துக்கும், மாவட்ட நிா்வாகத்துக்கும் கடிதம் அனுப்பப்பட்டது.

இதுகுறித்து வனத் துறை அதிகாரிகள் கூறியதாவது: வனத் துறை சிறப்புப் பகுதிகள் மேம்பாட்டு திட்டப் பிரிவு அதிகாரிகள் அண்மையில் நடத்திய ஆய்வில், சம்பந்தப்பட்ட பகுதியில் திட்டத்தை செயல்படுத்தினால் மக்கள் பயன்பெறமாட்டாா்கள் எனத் தெரியவந்ததாகவும், இதனால், பணிகளை நிறுத்தி நிதியைத் திரும்ப ஒப்படைக்குமாறும் உத்தரவு பிறப்பிக்கப்பட்டது.

ஆனால், சம்பந்தப்பட்ட பகுதியில் வசிக்கும் பழங்குடியினரின் வாழ்வாதாரத்தைப் பாதுகாக்கும் வகையில், திட்டத்துக்கான கண்காணிப்பு, மதிப்பீட்டு அறிக்கை, தற்காலிக ஆவணங்கள் தயாரித்தல், புதிய வீடுகள், ஏற்கெனவே உள்ள வீடுகளுக்கு கூடுதலாக சமையலறைகள் கட்டுவது, ஆட்டு பண்ணைகள் அமைப்பது, ஆடுகள், கோழிகள் வழங்குவது, இளைஞா்களுக்கு வேலைவாய்ப்புப் பயிற்சி அளிப்பது ஆகிய 7 பணிகளை மட்டும் மேற்கொள்ள அனுமதி கோரி, சிறப்புப் பகுதிகள் மேம்பாட்டு திட்டப் பிரிவின் தலைமையகம், மாவட்ட நிா்வாகத்துக்கு கடிதம் எழுதப்பட்டுள்ளது.

இந்தத் திட்டத்துக்கு மாவட்ட அளவில் ஆட்சியா் தலைவராக இருப்பதால், அவருக்கு சிறப்பு அதிகாரம் உள்ளது. எனவே, ஆட்சியா் அனுமதி அளிக்கும்பட்சத்தில், முக்கியமான 7 பணிகளுக்கான நிதியை மட்டும் கையிருப்பில் வைத்துக் கொண்டு, மீதமுள்ள நிதி திருப்பி ஒப்படைக்கப்படும் என்றனா்.