பொது இடங்களில் நிறுவப்படும் கட்சிக் கொடிகளால் பிரச்னை; உயா்நீதிமன்றம் வேதனை

பொது இடங்களில் நிறுவப்படும் கட்சிக் கொடிகளால் பல்வேறு பிரச்னைகள் ஏற்படுவதாக சென்னை உயா்நீதிமன்ற மதுரை அமா்வு செவ்வாய்க்கிழமை வேதனை தெரிவித்தது.

மதுரை விளாங்குடியைச் சோ்ந்த சித்தன் தாக்கல் செய்த மனு: அதிமுகவின் 53-ஆவது ஆண்டு விழாவை முன்னிட்டு, மதுரை கூடல்புதூா் பகுதியில் உள்ள அந்தக் கட்சி கொடிக் கம்பத்தை அகற்றிவிட்டு, புதிய கொடிக் கம்பம் நிறுவ அனுமதி வழங்குமாறு மாநகராட்சி அதிகாரிளுக்கு உத்தரவிட வேண்டும் என அவா் கோரியிருந்தாா்.

இதேபோல, மதுரை புறவழிச் சாலை பேருந்து நிறுத்தம் அருகே போக்குவரத்துக்கு இடையூறு இல்லாத இடத்தில் அதிமுக கட்சிக் கொடிக் கம்பம் நிறுவ அனுமதிக்க அளிக்க வேண்டும் என மதுரை மாடக்குளம் பகுதியைச் சோ்ந்த அந்தக் கட்சியின் மாவட்டப் பிரதிநிதி கதிரவன் மனுத் தாக்கல் செய்தாா். இந்த மனுக்கள் உயா்நீதிமன்ற நீதிபதி இளந்திரையன் முன் செவ்வாய்க்கிழமை விசாரணைக்கு வந்தது.

அப்போது, பொது இடங்களில் கட்சிக் கொடிக் கம்பம் நிறுவுவது தொடா்பாக காவல் துறையின் பங்களிப்பு என்ன?, விதிமுறைகள் ஏதும் உள்ளனவா என நீதிபதி கேள்வி எழுப்பினாா்.

அரசு வழக்குரைஞா் முன்னிலையாகி, தமிழகத்தில் கட்சிக் கொடிக் கம்பங்கள் நிறுவுவது தொடா்பாக 114 வழக்குகள் பதிவாகியுள்ளன. ‘தடையின்மைச் சான்று வழங்குவது மட்டுமே காவல் துறையினரின் பங்கு. தற்காலிகமாக கட்சிக் கொடிக் கம்பம் நிறுவ அனுமதி கோரும் சாலை எந்த வரம்புக்குள் வருகிறதோ அந்த எல்லைக்குள்பட்ட அதிகாரி தடையின்மைச் சான்றிதழ் வழங்க வேண்டும் என வழிகாட்டுதல்கள் உள்ளன என்றாா்.

நீதிபதி இளந்திரையன் பிறப்பித்த உத்தரவு: கட்சிக் கொடிக் கம்பங்களை நிறுவ நிரந்தரமான எந்த விதிகளும் இல்லாத நிலையில், எவ்வாறு இவை நிறுவப்படுகின்றன?. அந்த இடத்துக்கு சம்பந்தப்பட்ட கட்சியினா் வாடகை செலுத்தலாமே?.

பொது இடங்களில் ஏராளமான கட்சிக் கொடிக் கம்பங்கள் உள்ளன. இதனால், ஏராளமான பிரச்னைகள் எழுகின்றன.

பொதுவான இடத்தில் கட்சிக் கொடிக் கம்பத்தை நிறுவ ஏன் அனுமதி கோருகிறீா்கள்?. ஒவ்வொருவரும் தங்களது வீடுகளின் முன் வைத்துக் கொள்ளலாமே? பொது இடம் பொதுமக்களுக்கானது. கொடிக் கம்பங்களை வைக்க வேண்டும் எனில் சொந்தமாக நிலம் வாங்கி வைத்துக் கொள்ளலாமே? ஒவ்வொரு பேருந்து நிலையத்திலும் ஏராளமான கட்சிக் கொடிக் கம்பங்கள் நிறுவப்பட்டுள்ளன. இது வேதனை தருகிறது. இதுதொடா்பாக விரிவான உத்தரவு பிறப்பிக்கப்படும். வழக்கு விசாரணை ஒத்திவைக்கப்படுகிறது என்றாா் நீதிபதி.