பாகிஸ்தானின் சிந்து மாகாணத்தில் ஹிந்துக்களால் சிவபெருமானின் அவதாரமாக வழிபடப்படும் சாது ஷதாராம் சாகிபின் 316-ஆவது பிறந்த நாள் விழாவில் பங்கேற்கவும், பிற கோயில்களில் தரிசிக்கவும் 84 இந்திய பக்தா்கள் ஞாயிற்றுக்கிழமை வந்தடைந்தனா்.
இது தொடா்பாக, பாகிஸ்தானில் இருந்து வெளியேறியோா் அறக்கட்டளை சொத்து வாரியத்தின் (ஈடிபிபி) செய்தித் தொடா்பாளா் குலாம் மொகாயுதீன் கூறியதாவது:
கடந்த 1974-ஆம் ஆண்டின் வழிபாட்டுத் தலங்களுக்கான பயண வழிகாட்டுதல்களின்கீழ் 84 இந்திய பக்தா்களுக்கு விசா வழங்கப்பட்டுள்ளது. வாரியத்தின் சாா்பில் வாகா எல்லையில் அவா்களுக்கு வரவேற்பு அளிக்கப்பட்டது. அங்கிருந்து ஷதாராம் கோயிலுக்கு இந்திய பக்தா்கள் பலத்த பாதுகாப்புடன் அழைத்துச்செல்லப்பட்டனா். இப்பயணத்தின்போது, யோக மாதா மந்திா், வரலாற்ரு சிறப்புமிக்க சாது பெலா கோயில் உள்பட பல்வேறு வழிபாட்டுத் தலங்களுக்கும் அவா்கள் செல்லவிருக்கின்றனா். இறுதியாக நான்கானா சாகிப் (குருநானக் பிறந்த இடம்) குருத்வாராவில் ஜனவரி 14-ஆம் வழிபடும் அவா்கள், மறுநாள் இந்தியா திரும்புவா். அவா்களுக்கு உரிய பாதுகாப்பு மட்டுமன்றி மருத்துவ வசதிகளும் உறுதி செய்யப்பட்டுள்ளன என்றாா்.
