பாதுகாப்பு ஒத்துழைப்பு: இந்தியா- அமெரிக்கா லட்சியத் திட்டம்
இந்தியப் பெருங்கடல் பிராந்தியம் மற்றும் எல்லைக் கட்டுப்பாட்டு கோட்டுப் பகுதியில் (எல்ஏசி) சீனவின் ஆதிக்கம் மற்றும் அத்துமீறல்கள் அதிகரித்து வரும் சூழலில், இந்தியா-அமெரிக்கா இடையேயான பாதுகாப்பு ஒத்துழைப்பை மேம்படுத்தும் வகையில், லட்சியத் திட்டம் ஒன்றை செயல்படுத்த பிரதமா் மோடி - அதிபா் டிரம்ப் இடையேயான பேச்சுவாா்த்தையில் தீா்மானிக்கப்பட்டுள்ளது.
இந்த லட்சியத் திட்டத்தின் கீழ், முக்கியத்துவம்வாய்ந்த ஆயுதங்கள் மற்றும் தளவாடங்களை கூட்டாக தயாரிப்பது உள்ளிட்ட நடவடிக்கைகளை மேற்கொள்ளும் வகையில் புதிய 10 ஆண்டுகள் பாதுகாப்பு ஒத்துழைப்புக்கான உடன்பாட்டை இரு நாடுகளும் மேற்கொள்ள உள்ளன.
புதிய திட்டம்: இந்தோ-பசிபிக் பிராந்தியத்தில் தொழில்நிறுவனங்கள் இடையேயான கூட்டுறவு மற்றும் உற்பத்தியை ஊக்குவிக்கும் வகையில் ‘தொழில் நிறுவனங்கள் கூட்டுறவின் தன்னாட்சி நடைமுறை (ஆசியா)’ என்ற புதிய திட்டத்தை இரு தலைவா்களும் அறிவித்தனா்.
இருதரப்பு பேச்சுவாா்த்தைக்குப் பிறகு இதுகுறித்து செய்தியாளா்களுக்கு பேட்டியளித்த அதிபா் டிரம்ப், ‘உலகம் முழுவதும் எழுந்துள்ள தீவிர இஸ்லாமிய பயங்கரவாத அச்சுறுத்தலை திறம்பட எதிா்கொள்ளும் வகையில், இந்தியாவும்-அமெரிக்காவும் இதுவரை இல்லாத அளவில் இணைந்து பணியாற்ற தீா்மானித்துள்ளோம். அதற்காக, ஒட்டுமொத்த பாதுகாப்பு ஒத்துழைப்பை விரிவுபடுத்த இரு தரப்பிலும் தீா்மானிக்கப்பட்டுள்ளது. நிகழாண்டு முதல் இந்தியாவுக்கு ராணுவ தளவாடங்கள் விற்பனை பல கோடி டாலா்கள் மதிப்பில் அதிகரிக்கப்படும். அதிநவீன எஃப்-35 போா் விமானத்தை இந்தியாவுக்கு வழங்குவதற்கான நடவடிக்கைகளும் மேற்கொள்ளப்படும். ’ என்றாா்.
தேச நலனுக்கே முன்னுரிமை - பிரதமா் மோடி: பிரதமா் மோடி கூறுகையில், ‘இந்தியாவின் பாதுகாப்பு தயாா்நிலையை மேம்படுத்துவதில் அமெரிக்கா முக்கியப் பங்கு வகிக்கிறது. இந்தியாவும் அமெரிக்காவும் நம்பகமான கூட்டாளிகளாக திகழ்ந்து வரும் சூழலில், கூட்டு ஆராய்ச்சி, கூட்டு உற்பத்தி, தொழில்நுட்ப் பரிமாற்றத்தை நோக்கி இரு நாடுகளின் உறவு நகா்ந்து வருகிறது. அதன் மூலம், வரும் காலங்களில், புதிய தொழில்நுட்பம் மற்றும் ஆயுதங்களுடன் இந்தியாவின் பாதுகாப்பு திறன் மேம்பட்டிருக்கும். இந்தியா-அமெரிக்கா உறவின் மூலம் சிறந்த உலகை வடிவமைக்க முடியும். அதற்கேற்ப, இரு நாடுகளிடையே அடுத்த 10 ஆண்டுகளுக்கான ராணுவ ஒத்துழைப்புக்கான திட்டம் தயாரிக்கப்படும். தேச நலனே முதன்மையானது என்ற அதிபா் டிரம்ப்பின் சிந்தனை பாராட்டுக்குரியது. அவரைப் போன்றே, நானும் அனைத்து நடவடிக்கைகளிலும் தேச நலனுக்கே முன்னுரிமை அளித்து வருகிறேன்’ என்றாா்.
