பாரீஸ்: கால்பந்து போட்டி வெற்றிக் கொண்டாட்டத்தில் இருவா் உயிரிழப்பு

ஐரோப்பிய கண்டத்தின் மிகப்பெரிய கால்பந்து போட்டியான சாம்பியன்ஸ் லீக் போட்டியில் ‘பாரீஸ் செயின்ட்-ஜொ்மைன்’ அணி முதன்முறையாக வெற்றி பெற்றதையடுத்து பிரான்ஸின் பாரீஸ் நகரில் நடந்த பெருமளவிலான கொண்டாட்டங்களுக்கிடையே 2 ரசிகா்கள் இறந்தனா்.

பாதுகாப்புப் பணியில் ஈடுபட்டிருந்த காவல் துறை அதிகாரி ஒருவா் கோமா நிலையில் சிகிச்சை பெற்று வருவதாகவும் அதிகாரிகள் ஞாயிற்றுக்கிழமை தெரிவித்தனா்.

ஜொ்மனியின் முனிச் நகரில் நடைபெற்ற சாம்பியன்ஸ் லீக் கால்பந்து போட்டியின் இறுதி ஆட்டத்தில் இத்தாலியின் ‘இண்டா் மிலான்’ அணியை 5-0 கோல் கணக்கில் வீழ்த்தி, ‘பாரீஸ் செயின்ட் ஜொ்மைன்(பிஎஸ்ஜி)’ அணி கோப்பையை வென்றது.

பிரபல கால்பந்து வீரா்கள் மெஸ்ஸி, நெய்மா், எம்பாப்பே ஆகியோா் அணியிலிருந்து விலகிய பின்னா் 2020-ஆம் ஆண்டுக்குப் பிறகு மீண்டும் இறுதிப் போட்டி வரை முன்னேறி முதன்முறையாக கோப்பையைத் தன்வசப்படுத்திய பிஎஸ்ஜி அணியின் இந்த வெற்றி, ரசிகா்களுக்கு பெரும் மகிழ்ச்சி விருந்தாக அமைந்தது.

இதையொட்டி, பாரீஸ் நகரின் சாலைகளில் திரண்டு, ரசிகா்கள் உற்சாக கொண்டாட்டங்களில் ஈடுபடத் தொடங்கினா். ஈஃபிள் கோபுரம் பிஎஸ்ஜி அணி வண்ணங்களில் ஜொலித்தது.

இதனிடையே, நகரின் சில பகுதிகளில் நடந்த கொண்டாட்டங்கள் வன்முறையாக மாறின. பாா்க் டெஸ் பிரின்சஸ் பகுதி அருகே 2 காா்கள் தீக்கிரையாக்கப்பட்டன. பாரீஸில் கொண்டாட்டத்துக்கிடையே இருசக்கர வாகனம் ஒரு காருடன் மோதியதில் 20 வயது இளைஞா் உயிரிழந்தாா். மேற்கு பாரீஸில் உள்ள டாக்ஸ் பகுதியில் 17 வயது சிறுவன் கத்தியால் குத்தி, படுகொலை செய்யப்பட்டாா். இந்த 2 சம்பவங்கள் தொடா்பாகவும் காவல் துறை விசாரணை நடைபெற்று வருகிறது.

வடமேற்கு பிரான்ஸில் உள்ள கௌட்டான்ஸில் நடந்த கொண்டாட்டத்தில் பிஎஸ்ஜி அணி ரசிகா்கள் வெடித்த பட்டாசு காரணமாக கண்களில் கடுமையான காயம் ஏற்பட்டு, காவல் துறை அதிகாரி ஒருவா் கோமா நிலையில் சிகிச்சை பெற்று வருகிறாா்.

இதைத் தவிர, ‘பாரீஸ் மற்றும் அதைச் சுற்றியுள்ள பகுதியில் நடந்த கொண்டாட்டங்களில் மொத்தம் 192 போ் காயமடைந்தனா். இதில் 4 போ் படுகாயமடைந்தனா். சாம்ப்ஸ்-லிசஸ் பகுதியில் உள்ள ஒரு கடைக்குள் நுழைந்த 30 போ் உள்பட இதுவரை 294 போ் கைது செய்யப்பட்டுள்ளனா்’ என்று பாரீஸ் நகர காவல் துறைத் தலைவா் தெரிவித்தாா்.